BRASILIË GOOI WAL
Brasilië se hoenderprodusente ontvang nie staatsubsidies nie, soos die Suid-Afrikaanse pluimveebedryf beweer. Die Brasiliaanse ambassade skryf in ’n brief in die dagblad Business Day dié land se pluimveebedryf “speel volgens die reëls” en hul hoendervleis “is van hoë gehalte”. Brasiliaanse produsentepryse is volgens die ambassade histories hoër as die wêreldgemiddelde. Voorts is dit ook onwaar dat Korea, Mexiko en Japan driesyfertariewe op Brasiliaanse hoendervleis hef. Die ad valoremtarief vir ontwikkelende lande is 21,11%, en Suid Afrika hef reeds 37% op sommige hoendervleisprodukte.