CINSAULT SE TERUGKEER
Van die 1950’s tot in die 1970’s het talle klassieke Stellenbosch Cabernet Sauvignon-wyne met ’n geheime bestanddeel gespog. ’n Tikkie Cinsault is bygevoeg om elegansie en parfuumgeure te verleen, maar dis selde op die etiket vermeld.
False Bay Vineyards het pas sy eerste Revenant Red bekend gestel, ’n vernuwende versnit van Cabernet Sauvignon en Cinsault – nes die destydse Kaapse meesters dit gemaak het.
Revenant Red 2017 word gemaak van Cinsaultdruiwe uit ’n droëlandbosstokwingerd wat al 35 tot 40 somers agter die blad het. Die Cabernet Sauvignon-druiwe kom uit verskillende blokke, waarvan sommige sowat 250 m bo seevlak lê.
Albei kultivars se wingerde het ’n pragtige uitsig oor Valsbaai. Die versnit bestaan uit 80% Cabernet Sauvignon en 20% Cinsault.
Prys: R100 (By die Waterkloof-kelder).