BRANDSTOFPRYSE: GOEIE NUUS VERBY
Ná stewige dalings in brandstofpryse die afgelope twee maande wag daar minder goeie nuus op veral petrolverbruikers met die aanpassing op 6 Februarie.
Mnr. Dawie Maree, hoof van landbou-inligting en bemarking by FNB, sê die Sentrale Energiefonds se syfers het teen 25 Januarie getoon die gemiddelde onderverhaling op petrol was sowat 6c per liter, wat dui op ’n styging in die petrolprys. Ten opsigte van diesel was daar ’n gemiddelde oorverhaling van sowat 4c per liter, wat tot ’n effense daling kan lei.
“Die twee groot faktore wat die plaaslike brandstofpryse bepaal, naamlik die wisselkoers en die Brent-ruolieprys, het in Januarie baie wisselvallig vertoon.
“Die olieprys het in Januarie weer tot bo $60 per vat gestyg nadat dit einde verlede jaar nog onder $55 per vat was.
“Die redes vir die wisselvalligheid is onder meer kommer oor die Chinese en internasionale ekonomie, die verloop van die handelsoorlog tussen China en Amerika, en pogings van Opul (die organisasie van petroleumuitvoerlande) om weer lewe in die oliemark te blaas. Die rand verhandel die afgelope paar weke teen R13,65 tot R14 teenoor die dollar.”
Maree sê die sterk dalings in brandstofpryse einde verlede jaar was goeie nuus vir verbruikers én boere. “Dit het die inflasievooruitsigte ook effens beter laat lyk, in so ’n mate dat die Reserwebank besluit het om die repokoers onveranderd te laat en die bank se inflasieverwagtinge afwaarts aan te pas. Ongelukkig het die onlangse styging in die graanpryse die vraag laat ontstaan of voedselpryse weer skerp kan styg. Die ekonomiese vooruitsigte vir vanjaar is dus ’n gemengde prentjie.”