LANDBOUNUUS UIT AFRIKA

1 ZIMBABWE | Gaan wit boere plase kry?

Wit boere in Zimbabwe kan plase kry in ’n herstrukturering van grondbesit wat sal volg ná ’n grondoudit wat tans onderweg is.

Mnr. Douglas Karoro, die land se adjunkminister van grond, landbou, landelike herverstiging, water en klimaat, het onlangs in die parlement gesê die oudit sal na verwagting in Maart vanjaar voltooi wees.

Hy sê die regering wil nie kyk na die ras, godsdiens of politieke affiliasie wanneer nuwe plaaseienaars oorweeg word nie, maar na ervaring en vaardigheid.

Zimbabwe se rampspoedige grondhervormingsprogram in die vroeë 2000’s het 6 000 wit boere sonder heenkome gelaat en sowat 300 000 swart families gebaat, maar daaronder was ook topamptenare in die regerende Zanu-PF-party. – Business Day

2 ETHIOPIË | Holland kry slae oor tef-patent

Die Internasionale Hof van Justisie in Den Haag het ten gunste van Ethiopië beslis in ’n dispuut oor die eienaarskap van kossoorte wat met tefmeel gemaak word.

’n Nederlanse maatskappy het in 2003 ’n patent geregistreer vir tefverwante produkte en beweer dit was die idee van ’n mnr. Jans Roosjen.

Ethiopië sê egter dié glutenvrye en voedsame kossoort is reeds duisende jare lank ’n stapelvoedsel en die Nederlandse patent weerhou Ethiopiërs daarvan om munt te slaan uit die groeiende gewildheid daarvan. – Mail & Guardian