SÓ GAAN JAN TAKS JOU MELK
MNR. TITO MBOWENI het in sy begrotingsrede gesê groter klem sal in die komende boekjaar op belastinginvordering geplaas word.
Verhogings in die aksynsbelasting vir alkohol en tabak sal volgens Mboweni ’n verhoging van R1 miljard in staatsinkomste meebring.
Belasting op ’n blikkie bier verhoog met 12c tot R1,74, op ’n bottel wyn van 750 ml met 22c tot R3,15, en met 84c op ’n bottel vonkelwyn van 750 ml tot R10,16. Belasting op ’n bottel whiskey styg met R4,54 tot R65,84. Aksynsbelasting vir sorghumbier bly onveranderd.
Mnr. Rico Basson, besturende direkteur van Vinpro, sê dié verhogings is in pas met inflasie en toon groter begrip vir die bedryf se probleme.
“Die wyn- en brandewynbedryf is tevrede met die inflasionêre verhogings wat vir hierdie produkte aangekondig is. Hierdie verhogings stem ooreen met die beleidsraamwerk wat in 2014 ingedien en bespreek is.”
TABAK EN BRANDSTOF
’n Pakkie sigarette se belasting styg met R1,14 tot R16,66, terwyl ’n sigaar met 64c meer belas sal word. Mnr. Francois van der Merwe, voorsitter van die Tabakinstituut van Suid-Afrika, sê dié verhoging is meer as inflasie, en sal sonder daadwerklike stappe om sluikhandel hok te slaan, eenvoudig bydra tot die sluikhandel in onwettige sigarette.
Die verhoging van die suikerbelasting van 2,21c/g vir meer as 4 g suiker per 100 ml, is gedoen “om te voorkom dat die waarde van die belasting weens inflasie
weggevreet word.”
Die brandstofheffing sal toeneem met 29c per liter petrol en 30c per liter diesel. Wait is bekommerd oor die invloed van die hoër brandstofheffing op die landbou se insetkoste.
“’n Effense ligpunt is dat die dieselrabat verhoog word en dat ’n beleidsdokument vir die verbetering van die stelsel later vanjaar vir kommentaar gepubliseer kan word.”
Mnr. Bennie van Zyl, hoofbestuurder van TLU SA, is ook bekommerd oor die hoër brandstofheffing “op ’n tydstip dat talle saaiboere vasgevang sit in ’n knypende droogte en weinig, indien enige, kapasiteit oor
het om hul produksieprosesse deur te voer”.
KOOLSTOFBELASTING
Koolstofbelasting sal vanaf 1 Junie 2019 geld en sal saam met brandstofbelasting R1,3 miljard vir die staatskas inbring. Die moontlikheid is ook genoem dat elektroniese sigarette en verhittingsprodukte vir tabak in die toekoms belas kan word.
Wait sê hoewel die landbou eers van koolstofbelasting vrygestel is, kan die sektor onregstreeks geraak word deur ’n heffing hiervoor op diesel.
Geld wat deur koolstofbelasting geïn word, gaan na die algemene staatskas, en volgens Wait sou dit beter gewees het om dit eenkant te hou om op kwessies te bestee wat met klimaatsverandering verband hou, wat droogtehulp kan insluit.