MARKTE ‘TREURIG’ VIR TAFELDRUIWE
GROOT hoeveelhede Amerikaanse tafeldruiwe wat weens die handelsoorlog tussen dié land en China heelwat later as gewoonlik bemark is, het sake vanjaar behoorlik vir plaaslike tafeldruif-uitvoerders beduiwel.
Boonop het die meeste tafeldruifproduserende lande in die Suidelike Halfrond stewige oeste wat om internasionale rakruimte meeding. Die wisselkoers – wat tot onlangs onder R13 teenoor die dollar was – was ook nie gunstig vir uitvoerprodusente nie.
Verskeie bronne het aan Landbouweekblad gesê dis een van die moeilikste jare tot dusver om tafeldruiwe uit te voer. Een boer het dit as ’n “treurige jaar” vir die bedryf beskryf.
KALIFORNIË SE ‘POT’
Volgens mnr. Willem Bestbier, uitvoerende hoof van die Suid- Afrikaanse tafeldruifbedryf (Sati), het die Chinese mark vir Amerikaanse tafeldruiwe in Desember basies toegeklap weens die handelsoorlog tussen Amerika en China.
Die Kaliforniese tafeldruifbedryf het egter die tegniek bemeester en beskik oor die vermoë om groot hoeveelhede druiwe op te berg. Luidens ’n artikel op Fresh Fruit Portal is meer as 18 miljoen kartonhouers Kaliforniese tafeldruiwe einde Oktober opgeberg. Danksy ingryping van die Amerikaanse regering het dit einde Desember tot ongeveer 1,5 miljoen kartonhouers afgeneem.
Hierdie “pot” tafeldruiwe het beteken Peru, wie se seisoen in Oktober begin, kon nie oudergewoonte tot 80% van sy druiwe na Amerika uitvoer nie.
“Peru het dit toe na Brittanje en Europa uitgevoer, wat Suid-Afrika se tradisionele markte is. Daar was vanaf week 48, wanneer Suid-Afrika se vroeë produksiestreke al druiwe begin pak, ’n ooraanbod van druiwe op dié markte. Verligting het eers rondom week 2 en 3 gekom, toe die Amerikaanse voorraad meer in balans gebring is,” sê Bestbier.
Peru het ook Suidoos-Asië en die Verre-Ooste geteiken, wat beteken die alternatiewe markte vir Suid-Afrikaanse druiwe is ook versadig.
“Die ontwrigting het internasionaal plaasgevind,” sê Bestbier.
PRYSE BLY PAP
Dis moeilik om pryse “op te baklei” as die openingsweke se pryse swak was, sê hy.
“Die jaar het prysgewys moeilik begin, en dan is dit ’n onbegonne taak om die prys opgestoot te kry. Boonop bly die wêreldekonomie pap. Daarby is dit een van die uitsonderlike jare waarin die Suidelike Halfrond-lande, soos Peru en Suid-Afrika, en Indië almal met goeie oeste spog.”
Ten spyte van die probleme sê Bestbier hulle bly optimisties dat die later produksiestreke soos die Bergrivier- en die Hexriviervallei sterk gaan eindig.
“Ek vertrou boere sal aanpas by die markomgewing, en vorentoe kyk na maniere om te verbeter en slimmer te werk te gaan. Dis nou die regte tyd om te besin oor kultivars en markte.
“Dis ’n mooi oes wat inkom. Al teleurstelling is die Olifantsriviervallei, wat nie so vinnig van die droogte herstel het as wat ons gehoop het nie.”