Bestuur jou plaas uit Finland
OM Suid-Afrikaanse boere onder meer teen onteiening sonder vergoeding te beskerm, het ’n Britse maatskappy en ’n plaaslike regsfirma saamgespan om boere te help om buitelandse maatskappye te skep waardeur hul plase bestuur kan word.
Die Britse bestuurskonsultant Forseti Consult en die Kaapse regsfirma Glenn Rooseboom steun vir hul projek op ’n bestaande ooreenkoms tussen Finland en Suid-Afrika oor wedersydse beleggingsbeskerming.
Kortliks kom dit daarop neer dat ’n bestuursmaatskappy in Finland deur die Suid-Afrikaanse boer geskep word, asook ’n Finse bedryfsmaatskappy in Suid-Afrika wat die plaas oor ’n lang tydperk bruikhuur en bestuur. Die boer is dan die eienaar van albei maatskappye, en ál die aandele word in Finland gehou. Die boerdery verwissel nie van hande nie en gaan normaalweg voort.
Me. Tamsyn Byrne, ’n verteenwoordiger van Forseti in Suid-Afrika, sê daar is op Finland besluit omdat dié land die mees bindende ooreenkoms met Suid-Afrika het om Finse belange hier te beskerm. Die ooreenkoms van 20 jaar loop egter in September ten einde, maar bied nog verdere beskerming aan Finse belange wat teen daardie tyd gevestig is.
TOEVLUG
Indien die boerdery enige skade ly weens byvoorbeeld onteiening, kan die bestuursmaatskappy in Finland ’n eis teen die Suid-Afrikaanse Regering instel. Indien dit nie slaag nie, kan die saak op internasionale arbitrasie geneem word. ’n Besluit daar is afdwingbaar op enige land wat aan die Wêreldbank behoort.
“Buiten vir die beskerming van eiendomsreg bied die betrokkenheid van Finland aan die Suid-Afrikaanse boer ook ander voordele. Dit vergemaklik toegang tot markte in Europa, en gunstiger finansiering kan in die buiteland bekom word,” sê me. Eileen Nash, ook ’n plaaslike verteenwoordiger van Forseti.
Wat koste betref, sê sy die prosesse in Suid-Afrika kos sowat R50 000 en in Finland sowat R120 000, na gelang van die wisselkoers.
—