Só verloop stryd teen grondvat

DIE eerste geveg teen ’n grondwetverandering wat onteiening sonder vergoeding moontlik maak, sal by die stembus geskied.

Só sê mnr. Mark Oppenheimer, Johannesburgse advokaat en eiendomsregkenner, wat onlangs die regsroetes teen onteiening sonder vergoeding op ’n geleentheid van die Vryemarkstigting uiteengesit het.

Hy wys daarop dat die partye wat in die Parlement teen ’n grondwetswysiging gestem het, die ACDP, IFP, VF+, Cope en DA was.

Vir ’n wysiging aan die Grondwet is twee derdes van die stemme nodig. Altesaam 69,6% het vir die resolusie gestem. As die opposisiepartye net meer as 4% steun saam

bykry, kan dit die meerderheid tot onder twee derdes afbring.

Die volgende geveg sal in die Grondwethof wees, sodra die bewoording van die beoogde wet duidelik is.

Oppenheimer glo die Grondwet bevat verskeie beskermingsmaatreëls waarmee enige radikale afwyking betwis sal kan word.

As ’n wysiging die oppergesag van die reg en basiese menseregte skend, sal dit betwis kan word. Daarby sal artikel 1 van die Grondwet ook moet verander, wat ’n meerderheid van 75% verg.

Organisasies wat reeds hul hulpbronne vir die stryd teen ’n verandering aan artikel 25 inspan, sluit in die Helen Suzman-stigting, AfriForum, Sakeliga, die SA Instituut vir Rasseverhoudinge, die Vryemarkstigting en die Johannesburgse vereniging vir advokate.

—