ROBOTTE WORD DALK TOEKOMSTIGE SKAAPSKEERDERS
ROBOTTE wat skape skeer? Dít kan gouer gebeur as wat ons dink, sê die Australiese navorsings-en-ontwikkelingsorganisasie Australian Wool Innovation (AWI).
Die AWI gaan in die volgende paar jaar nagenoeg R100 miljoen aan navorsing bestee om die skeer van wol meer vaartbelyn te maak en die tekort aan skaapskeerders die hoof te bied. Dié organisasie wil die proses om die wol van die skaap tot in ’n baal te kry, outomatiseer.
Hoewel Australië se skaapkudde die afgelope 30 jaar meer as gehalveer het tot 73 miljoen, het die getal skaapskeerders ook drasties gedaal tot net 2 800.
Die oplewing in die mynbedryf het groot
getalle skaapskeerders weggelok, terwyl Nieu-Seelandse skeerders, wat tradisioneel die helfte van die Australiese skeerders uitgemaak het, weens salarisverhogings in Nieu-Seeland nou eerder tuisbly.
“Dit is daarom noodsaaklik dat ons ondersoek instel na alternatiewe metodes om skape te skeer,” sê dr. Jane Littlejohn, hoof van die navorsingsafdeling by die AWI.
Die Universiteit van Tegnologie in Sydney het in sy robotlaboratorium reeds meganiese arms met gewrigte gebou wat deur elektriese motors en rekenaarprogramme aangedryf word, en aan die rug en sye van ’n skaap kan raak.
Die arms word getoets op Shauna, ’n skaap wat met ’n 3D-drukker gedruk is.
“Deur sensors wat lig, klank, hitte, vibrasie en visuele seine byvoeg, kan ’n robot geprogrammeer word om sy bewegings by elke skaap aan te pas,” sê mnr. Mickey Clemon, wat saam met sy span aan die ontwikkeling van ’n robot werk.
Hy beklemtoon die oogmerk is nie om skeerders te vervang nie, maar om bystand te verleen sodat robotte saam met tradisionele skeermetodes gebruik kan word.
“Dit kan kostedoeltreffend wees as die robot die maklike deel van die vag skeer en die skeerder die moeiliker dele, soos die bene, maag en die mik van die skaap,” sê hy.
Die meeste skeerders is skepties en sê ’n robot kan nie voel wanneer dit teen die vel is nie en kan ook nie rondom plooie werk nie.
Mnr. Hilton Barrett, ’n skeerkontrakteur, sê robotte gaan nie die skeerderprobleem oplos nie. Beter werkomstandighede sal skeerders teruglok. Hy meen die infrastruktuur op die meeste plase is in ’n treurige toestand. Sowat 80% van die skeerskure waar sy skeerders werk, is onveilig met swak geriewe vir die skeerders.
Die nasionale boerefederasie (NFF) van Australië is egter opgewonde oor die vooruitsig van robotskeerders en sê die bedryf moet vernuwend dink.