DROOGTEHULP ONTROER ONTVANGERS ÉN SKENKERS
FRANKFORT in die Vrystaat en Aberdeen in die Oos-Kaap is meer as 800 km uitmekaar, maar tussen dié twee boeregemeenskappe is ’n band van vriendskap gesmee wat alle afstand oorbrug.
Boere op Frankfort het met Droogtehulp met Burre Burger en hul plaaslike boerevereniging saamgewerk en 32 vragmotors noodvoer na ’n distrik gestuur wat reeds die afgelope drie jaar een van die ergste droogtes in menseheugenis beleef.
“Jy proe die droogte in die lug,” sê me. Elize Hattingh, ’n boervrou van Frankfort, wat saam met haar man, Jaco, die afgelope naweek Aberdeen toe gery het.
“Toe die konvooi vragmotors met voer daar stilhou, het ons groot manne sien huil van dankbaarheid. Iemand het vertel dat hy daardie oggend sy laaste baal voer vir sy skape uitgestrooi het. Hy het nie geweet waar die volgende kos vir sy diere vandaan sou kom nie. Toe hy weer sien, kom daar vragmotors met voer oor die bult aangery.”
Elize sê die Frankforters se skenking aan Aberdeen was eintlik ’n verrassing. “Hulle was stomgeslaan, en ons was geskok om die omvang van die droogte met ons eie oë te sien.”
Die Frankfortvroue het ook meer as 60 “bederfpakkies” vir die boervroue van Aberdeen gemaak. Elke skenker het ’n bemoedigingsbrief by produkte soos sjampoe, lyfroom en koffie in die pakkie gesit. “Omdat ons weetwatditvan’nvrouvergom haar man te ondersteun te midde van swaarkry, wou ons iets tasbaars vir hulle gee om te wys hulle is nie alleen in dié stryd nie.”
Jaco en Elize se versoek om die Karooboere met voer te help, is gou deur die boerevereniging van Frankfort, waar dit goed gereën het, ondersteun.
“Almal in die distrik het saamgestaan. Ek glo as dit by ons kan gebeur, kan dit elders ook gebeur, en ek daag ander gemeenskappe uit om ook uit te reik.”
Volgens Burger het dit die naweek in die distrik Aberdeen gereën, maar die nood is steeds hoog. “Dit reën nog nie voer nie.”