VROU GEBRUIK VERJAARDAG OM BOERE TE HELP
’N VROU van Centurion het vanjaar besluit om haar verjaardag te gebruik om boere in die greep van die droogte by te staan. Haar vriende het verwag dat hulle oudergewoonte Bosveld toe sou gaan om me. Tanya Duvenhage se verjaardag te vier, maar sy het op ’n geskenk vir die Hopetownboere in die Noord-Kaap besluit.
Soos talle Suid-Afrikaners het Duvenhage die afgelope tyd op sosiale media stories en foto’s gesien van die langdurige droogte wat die landboubedryf op sy knieë het. Dit het haar aangegryp en sy het besluit om ’n helpende hand uit te reik. “Ons gaan gereeld Bosveld toe om my verjaardag te vier. Vanjaar het ek besluit om eerder geld vir droogtehulp in te samel,” sê sy. “Ek is geseën met goeie mense om my. Toe hulle begin uitvra oor my verjaardagreëlings, het ek ’n WhatsApp-groep begin om vir droogtehulpskenkings te vra.”
Danksy dié skenkings kon sy 67 bale voer koop. Die voer is die naweek met ’n geborgde bakkie en sleepwa al die pad van Centurion na Hopetown geneem. “Ek moes my trane sluk toe die voer afgelaai
word. Die mense was so dankbaar, ek kon nie glo ’n bietjie voer kan so baie vir iemand beteken nie.” Sy hoop dit sal ander SuidAfrikaners aanmoedig om hul harte vir die boere oop te maak.
Terwyl Duvenhage op Hopetown was, het dit het liggies gereën. Mnr. Naudé Pienaar, assistent-hoofbestuurder van Agri Noordwes, sê dié reënval van sowat 12 mm was miskien genoeg om boere moed te gee, maar dit is nie genoeg om hulle uit hul benarde situasie te red nie. Droogtehulp en veral voerskenkings bly broodnodig. Hy verteenwoordig Agri SA as deel van ’n groep organisasies wat landwyd probeer om hulp vir veral veeboere te reël. Die organisasies wat saamwerk,
is Agri SA, die Save the Sheepprojek van Sutherland, Gift of the Givers en Caring Daisies.
Die voernood onder boere is steeds groot en hy sê almal sal moet help om die landboubedryf in die droogte by te staan. “Daar is mense wat nie net ’n krisis beleef nie, hulle beleef ’n ramp. Dit gaan oor meer as voedselsekerheid, dit gaan oor boere se oorlewing.”
Volgens hom beoog Agri SA om solank as wat nodig is, droogtehulp te verskaf. Tans is voerskenkings en geld om vir die vervoer daarvan te betaal, die dringendste.
Mense wat hulp wil verleen, kan Pienaar bel by tel. 018 632
3612, of stuur ’n e-pos na wanda@ agrinw.co.za