MEER GARS IN 2018 GEOES
Die totale garsoes van bykans 400 000 ton in 2018 was aansienlik groter as die 2017-oes van 307 000 ton, sê mnr. Frikkie Lubbe, landboubestuurder vir Afrika by AB InBev.
Altesaam 329 780 ton is in die droëlandgebiede in die Wes-Kaap geoes en 69 286 ton in die besproeiingsgebied. “Die oostelike gebiede van die Overberg het swaar getrek in die heersende droogte, maar die ander gebiede het uitstekend gevaar. In die Swartland is besonder goeie opbrengste en gehalte behaal. Die besproeiingsgebiede het merkwaardige groei getoon met ’n gepaardgaande hoë opbrengs en gehalte.”
Die groter oes is die gevolg van ’n sameloop van die goeie verspreiding van reën (al was dit so min), die regte produksiepraktyke en gars se kompensasievermoë in veranderende klimaat.
In die besproeiingsgebiede het verbeterde produksiepraktyke danksy navorsing en ontwikkeling en die gebruik van beter aangepaste kultivars ’n rol gespeel. “Die klimaat het in ’n mate goed saamgespeel met ’n koeler korrelvultyd, maar erge wind het besproeiing bemoeilik.”
Volgens Lubbe het die maatskappy verlede jaar sy mikpunt van 415 000 ton plaaslike gars naelskraap gemis. Hy skryf dit toe aan die droogte in die oostelike deel van die Overberg.
Hessekwa is die algemeenste kultivar in die droëlandgebiede, terwyl dit Overture in die besproeiingsgebiede is.