BRANDRISSIES SORG VIR KREATIWITEIT
Die mark vir brandrissies en brandrissieprodukte brei uit in Suid-Afrika. Daarby begin Suid-Afrikaanse verbruikers ook ál waagmoediger word om met die verskillende brandrissieprodukte, soos sous, pesto en selfs konfyt, te eksperimenteer, sê me. Muriel Wadeley, bestuurder van Fynbos Fine Foods.
Dié onderneming boer sedert 1996 met ’n wye verskeidenheid brandrissies in die omgewing van Tierfontein in die Swartland. Hy droog, berook en preserveer brandrissies en vervaardig verskeie produkte vir die plaaslike en oorsese mark. Omdat die vraag so groot is, kontrakteer hy ook naburige plase om brandrissies vir hom te kweek.
“Daar is nie ’n spesifieke kultivar wat voorrang geniet nie. Suid-Afrikaanse verbruikers sal tipies die sterkte van die brandgeur reguleer deur die hoeveelheid wat bygevoeg word, pleks daarvan om ’n brandrissie te kies waarvan die sterkte bekend is.”
Volgens Fresh Plaza ondervind kwekerye ook ’n toename in belangstelling in brandrissieplante, veral van opkomende boere wat die brandrissies groen pluk en dan die plant terugsny sodat dit vir ’n tweede oesjaar dra. Op dié manier word produksiekoste verminder.
Die brandrissietyd duur van Januarie tot begin Junie, waarna dit skaarser raak en die prys ook dienooreenkomstig kan verhoog. Teen Augustus verlede jaar het pryse volgens Fresh Plaza hul hoogste vlak in sewe jaar bereik toe brandrissies van die hoogste gehalte tot R140 vir ’n sak van 2 kg behaal het, terwyl die prys in Gauteng gemiddeld R75 tot R80 per 2 kg was. Teen middel Februarie vanjaar het prys op die varsproduktemarkte in Gauteng tot R25 tot R40 per 2 kg gedaal.