LANDBOU BIED KRAGOPLOSSING
Die landbou se vermoë om elektrisiteit deur middel van sonkrag op te wek, kan Suid-Afrika in die toekoms van beurtkrag verlos. Mnr. Nicol Jansen, voorsitter van Agri SA se afdeling vir ekonomie en handel, sê regulasies wat boere toelaat om elektrisiteit deur middel van sonkrag op te wek en in die nasionale netwerk terug te plaas, behoort eersdaags afgehandel te wees.
“Daar is tans 400 aansoeke vir hernubare projekte vanuit die landbou, waarvan 56 reeds in verskillende fases van vordering is om elektrisiteit op te wek en in die nasionale netwerk terug te plaas. Indien ál hierdie projekte bymekaargetel word, sal daar 1 400 MW opgewek kan word, wat fase 1-beurtkrag sal kan keer,” volgens Jansen.
Hy sê egter Eskom en die Nasionale Energiereguleerder (Nersa) sal gedwing moet word om by hul tydraamwerk te hou om die projekte van stapel te stuur.
Jansen sê dat daar verskeie handelsbanke is wat besig is om produkte te skep sodat sonplase as hul eie sekuriteit kan dien.
“Daar is reeds een sonplaas wat só gefinansier is. Indien ons hierdie model kan uitbrei, kan dit die belangstelling en aansoeke verdubbel. Dit kan beteken dat dit vir die private sektor, en vir die landbou spesifiek, moontlik is om fase 3-beurtkrag dan binne die volgende twee jaar onnodig te maak,” het Jansen gesê.
Intussen gaan onderhandelinge tussen Agri SA en mnre. Pravin Gordhan, Minister van Openbare Ondernemings, en Jeff Radebe, Minister van Energie, voort.
“Niks hoef te verander nie. Die prosesse waaroor die georganiseerde landbou die afgelope drie jaar onderhandel het, moet net glad verloop en Eskom moet by sy gestruktureerde tydraamwerk hou sodat die landbou ’n elektrisiteitsoplossing kan bied,” sê Jansen.