BETAAL MENSE MEER VIR ORGANIESE PRODUKTE?
Veldgevoerde vleis, eiers van vrylopende hoenders, klipgemaalde meel . . . ’n handjie vol produsente bemark sulke spesiale produkte, maar hulle moet hul teikenmark goed ken en oppas.
Me. Hester Vermeulen van die Buro vir Voedsel-enLandboubeleid(BFAP)isnie bewus van enige studies wat plaaslike verbruikers se bereidwilligheid toets om hulhanddiepindiesaktesteekvirsulke kosprodukte nie.
“Dié produkte is op die rak beskikbaar en dit verkoop, dus is daar beslis mense wat dit verkies. Selfs sekere kettingwinkels het spesifieke nisreekse, maar dis nie deel van die hoofstroommark nie,” sê sy.
Vermeulen reken 5-10% van SuidAfrikaners kan sulke produkte bekostig én wil dit koop.
“’n Mens moet in ag neem dat almal wat dit kan bekostig, nie noodwendig daarin sal belang stel nie. Produsente het dus regtig ’n nismark. Verbruikers se bereidwilligheid om meer daarvoor te betaal, sal daarvan afhang of hulle dit as voordelig sien of nie.”
Die opvatting dat organiese kos voedsamer en smaakliker as konvensionele kos is en dat organiese landboupraktyke boere bevoordeel, is van die vernaamste redes waarom mense organiese kos verkies, skryf me. Wendy Engel in ’n studie (2009) by die Universiteit van Pretoria oor hoekom mense organiese kos koop. Haar navorsing het getoon jonger mense is meer geneig om organiese kos te kies. Verbruikers verlang egter ’n soort waarborg van die organiese oorsprong van die produkte.
Mnr. Eddie Ferreira sê mense het gefrons toe hy sy organiese eiers aanvanklik teen ’n veel hoër prys as konvensionele eiers begin bemark het. As pryse in kettingwinkels vergelyk word, kos “gewone” ekstragroot eiers sowat R43 vir 18 eiers, maar vrylopende hoenders se eiers gaan jou sowat R60 vir 18 ekstragroot eiers uit die sak jaag.
Wat die restaurantbedryf betref, geld anderreëlsin’nmate,wantverbruikers se pryssensitiwiteit is anders in eetplekke as wanneer hulle kruideniersware koop, sê Vermeulen.
Vir me. Michelle Bailey, algemene bestuurder van die restaurant Hello, It’s Me in Port Elizabeth, is dit glad nie ’n moeilike som om te maak nie.
“Ons restaurant maak gesondheidsbewuste keuses. Ek wil weet wat in my liggaam
ingaan en ek wil my klante dieselfde opsie gee. Organiese eiers bevat baie meer voedingstowwe as konvensionele eiers, en dit maak vanuit dié oogpunt klaar sin om meer daarvoor te betaal. Wat is die doel daarvan om ’n eier te eet as jy nie die proteïen daaruit kry nie?
“Die gehalte van organiese produkte is beter en ons vind dat organiese eiers baie langer hou. Ons berei baie geposjeerde eiers, en omdat die organiese eier se wit dikker is, behou dit sy vorm baie beter wanneer dit geposjeer word – selfs al is die eiers twee weke oud.”
Dan en wan is daar mense in die restaurant wat nie kan verstaan waarom hulle R32 vir twee geposjeerde eiers op roosterbrood moet betaal nie, maar die meeste van hul klante gee nie om nie.
“Hulle weet hulle kry 100% organiese eiers op boetiekbrood (artisanal bread) wat van klipgemaalde meel gemaak word.”
Volgens Bailey is dit moeilik om verskaffers van suiwer organiese produkte te kry.
“Ons wil graag nét organiese produkte en GM-vrye produkte aankoop, maar sodra jy die verskaffers begin uitvra oor hul insette en metodes, verdwyn hulle gewoonlik soos mis voor die son.” — LUCILLE BOTHA