Sonkrag-hekkie byna plat

’N KOMITEE van die Nasionale Energiereguleerder (Nersa) sal hopelik vandeesweek (27 Februarie) ’n registrasieheffing vir sonkragplase goedkeur.

Dit sal die weg baan vir boere met sonkragstelsels om by Nersa te registreer en só Eskom-krediete danksy sonkragopwekking te verdien.

Landbouweekblad het in Januarie berig dat vier kliënte van Sonfin onder die eerste boere is wat sedert Desember Eskom-krediete begin kry het, maar dat Nersa se gesloer met die afhandeling van vereistes vir die registrasieproses, spesifiek die vasstelling van ’n registrasieheffing, keer dat nóg boere hierby baat kan vind.

Sonfin installeer sonstelsels vir boere waarmee hulle krag wat hulle nie dadelik gebruik nie, op die Eskom-netwerk kan berg (dit staan bekend as banking).

Mnr. Chris Schutte, direkteur van Sonfin, sê hulle het kliënbeoog

te wat nét wag dat Nersa hul registrasiesertifikate uitreik sodat Eskom hul sonkragstelsels aan die netwerk kan koppel en hulle die voordele daarvan kan begin benut.

KLAAR GOEDGEKEUR

Nersa het in Desember ’n voorgestelde registrasieheffing van R200 vir kommentaar gepubliseer.

Schutte sê dit het op 7 Februarie op ’n vergadering van die elektrisiteitsubkomitee van Nersa geblyk die energiereguleerder het oorwegend gunstige kommentaar op die voorgestelde heffing ontvang.

Die subkomitee het, te mid-

de van ’n vol agenda, besluit dié kwessie is dringend en het dieselfde dag die registrasieheffing goedgekeur.

Dit is vir finale goedkeuring na die energiereguleerderkomitee verwys, wat dit hopelik op 27 Februarie sal oorweeg.

Schutte sê Sonfin het intussen heelwat nuwe navrae van belangstellende boere ontvang wat sonkragstelsels oorweeg.

Lees ook die berig op bl. 78 oor hoe boere wat sonkrag opwek, kan help om beurtkrag te verlig, mits Eskom en Nersa boere se aansoeke vinniger verwerk.