59 Mooi goed word ma endogterse sakeonderneming
Regina Kriel en Annelize le Roux is ’n gedugte ma-en-dogter-span in wie se are ’n goeie stroom kreatiwiteit vloei. Hulle vervaardig ’n reeks handgemaakte produkte en verkoop dit hoofsaaklik op markte. Annelize vertel waar alles begin het.
Hoe het jou onderneming, wat lasergesnyde en materiaalprodukte vervaardig, ontstaan? In 2015, ná my dogtertjie se geboorte, wou ek graag ’n ekstra inkomste verdien sodat ek tot my kinders se opvoeding en toekoms kan bydra. Aanvanklik het ek oorbelvormpies aangekoop en my ma het my gehelp om spoegdoeke en borslappe te maak. Nou het julle ’n uitgebreide reeks? Ja, ons doen ons eie lasersnywerk uit hout, akriel, papier, karton, rubber, skuimrubber en ander materiaal. Ons graveer ook op hout, rubber, emalje, leer en metaal. Ons materiaalreeks bestaan uit plekmatjies, servette, borslappe en spoegdoeke. Ook baie gewild is organiseerders vir jou motorsitplek, wat veral nuttig is as jy kinders het! Waar verkoop julle jul werk? Ons neem aan soveel markte moontlik deel. Ons produkte is ook by ’n paar koffiewinkels en restaurante beskikbaar. Ons kan ook vir klante spesiale artikels ontwerp en maak. Was jy nog altyd kreatief? My ouma het koeke en koekies gebak vir ’n lewe en haar twee hande het duisende truie, kussings en komberse gebrei. My ma is net so kreatief en knap met naaldwerk. Ek en sy is altyd besig met iets – as ons nie gipsvormpies maak nie, verf ons lappe of maak plakboeke (scrap booking). Is jy en jou ma steeds ’n goeie span? Ja, ek kan aan niemand beters as my ma dink om mee saam te werk nie. Haar naaldwerk is verskriklik netjies. Sy is ’n baie spesiale mens en ’n groot inspirasie. Sy maak al die naaldwerkprodukte, terwyl ek die produkte ontwerp. My man help ook, veral om metaal, glas en emalje te graveer. Vertel ons meer van jou werk en gesin. Ek werk al sewe jaar lank as administratiewe klerk by Kaap Agri op Rawsonville. My man, Wynand, is ’n plaasbestuurder by Eendracht Vrugte op Rawsonville. Hy boer met wingerd en pere en hulle het ook koejawelboompies geplant. Ons geniet die plaaslewe en dis ’n groot voorreg om ons twee kinders, Ioné (5) en Carel (amper 2), op die plaas groot te maak. Hoe balanseer jy ’n heeltydse werk, kinders en ’n eie onderneming? Tyd speel ’n groot rol en party dae sukkel ek om by alles uit te kom. Ek gebruik etenstye om my ontwerpe te doen. Ek hou spesifieke aande oop om aan bestellings te werk sodat ek ook genoeg tyd vir my man en kinders het. Ek meen ek sal my passie in die toekoms heeltyds kan beoefen. Dan sal ek ook beter kan beplan. Hoe het julle die onderneming aanvanklik gefinansier? Ek het met ’n spaargeldjie begin en ’n paar rand by my man geleen. Ek het die geld van al die verkope weer net so in die onderneming belê. ’n Mens moet eers kruip voor jy kan loop! Wat motiveer jou? My gesin en my kinders se toekoms. En ek geniet wat ek doen. Ek is op my gelukkigste as ek vir iemand iets moois maak. Dit is baie bevredigend as jou klante gaande is oor jou produkte. Watter raad het jy vir ander vroue wat hul eie onderneming wil bedryf? Stel vir jou klein doelwitte ten einde jou groot droom te kan uitleef. Harde werk sal altyd vrugte afwerp. Wat is die belangrikste les wat jy geleer het? My ouers het my geleer om nederig te bly. ’n Mens moet nooit dink jy het “gearriveer” nie. Jy is nooit beter as iemand anders nie, en almal se produkte is spesiaal. Wat hou die toekoms in? Ons kan heelwat uitbrei, want ek het baie idees, maar, ai, die tyd . . . Ek sal graag meer tyd aan die onderneming wil wy, veral met unieke ontwerpe vir klante. Binnekort wil ek van ons plaaswerkervroue insluit by die onderneming en só vir hulle werk skep.
NAVRAE: E-pos: Annelize le Roux, carlizeprodukte@gmail.com; of besoek haar Facebookblad (Carlize Products).