Milde neerslae laat Noorde asemskep
BOERE in die Vhembe-distrik in Limpopo is verheug oor die afgelope week se reën nadat dié gebied langer as drie jaar erge droogtetoestande beleef het.
Die Nzeleledam, ’n belangrike besproeiingsdam vir boere in die omgewing, was teen Woensdag 20 Februarie byna 75% vol, sê mnr. Willem van Jaarsveld, uitvoerende hoof van Limpopo Landbou.
Hoewel die reën verspoelings in die stedelike gebiede van Thohoyandou in Venda veroorsaak het en enkele boere op die grens van die Krugerwildtuin se infrastruktuur verspoel het, sê Van Jaarsveld die skade is, sover sy kennis strek, minimaal en dit plaas nie ’n demper op boere se dankbaarheid vir die reën nie.
In die Levubu-gebied het byna 250 mm reën van 14 tot 16 Februarie geval, en noord van Phalaborwa het boere 65 mm reën vir die naweek gemeet. Teen druktyd is meer as 120 mm vir Februarie in Phalaborwa self aangeteken.
DAMME VOL
In die Harmoniestreek tussen Tzaneen en Hoedspruit het 70 mm tot 100 mm op 15 Februarie uitgesak, en die Selatirivier het die eerste keer in twee jaar gevloei.
In die weste van Limpopo het die reën ook gehelp om damme en kuile vol te maak. Danksy goeie reën en baie water uit Gauteng wat in die Krokodilrivier uit die Hartbeespoortdam afloop, het die Limpoporivier teen die naweek sterk gevloei.
Die Blyderivierpoortdam naby Hoedspruit en die Hans Merensky-dam naby Tzaneen het begin oorloop. Hoewel die Tzaneendam se vlak effens gestyg het, is die dam nog kommerwekkend leeg met die watervlak op 16%. Die Middel-Letabadam was teen druktyd 8,1% vol. Die Glen Alpinedam waaruit boere in die Tolwe-omgewing besproei, was nog kommerwekkend leeg, met die damvlak op 18,7%.
“Ons is bekommerd oor die lae damvlakke, maar reën is net so belangrik. Jy kan uit damme en boorgate water gee, maar daar is niks soos reën vir vrugtebome nie,” sê mnr. Piet Smit van die Komati-groep.
MPUMALANGA
Hoewel enkele damme in Mpumalanga nie heeltemal so vol is as in die ooreenstemmende tydperk in vorige jare nie, sê mnr. Robert Davel van Mpumalanga Landbou dié provinsie het tot dusver ’n baie goeie reënjaar.
“Die suidwestelike dele van die provinsie lyk aansienlik beter as einde verlede jaar. Hoewel boere in die Hazyview-omgewing in die Laeveld nog reën sal verwelkom, is daar genoeg water om in hul onmiddellike behoeftes te voorsien.”