STADIG MET DIE LOFPRYSING VAN RAMAPHOSA
Ek vind Manie se rubriek in
LBW van 8 Februarie 2019 interessant, veral rakende Max du Preez se siening oor grondonteiening (“Onteiening – die prys om van Zuma ontslae te raak”). Vriend Max se relaas moet maar met ’n knippie sout geneem word, net soos die uwe se briewe ook maar met ’n knippie sout gelees moet word.
Ek moet meld dat ek heelhartig met hom saamstem dat die proses van grondhervorming een enorme gemors is weens die redes wat hy so raak beskryf. Dit is weens die onvermoë van die regering, asook bedrog en korrupsie deur die regering en sy amptenary. Die verandering van die Grondwet het egter nie soseer ten doel om die aandag van die Zuma-Gupta-alliansie weg te lei nie. Ons het almal al so gewoond geraak aan die stelery in Suid-Afrika dat ons dit soos ’n chroniese siekte begin dokter het om maar net te probeer oorleef.
Die vernaamste rede vir die verandering van die Grondwet is ideologies van aard, naamlik om die miljoene ANC kiesers iets te gee om na uit te sien, veral omdat hulle verveeld begin raak het met die gematigdheid van die regering. Oudpres. Jacob Zuma was tevrede om ongesteurd met sy stelery voort te gaan, en pres. Cyril Ramaphosa het in sy vyf jaar saam met
Zuma daaroor geswyg. Natuurlik is ek, soos Max, oortuig dat enigiemand aan die stuur van sake net beter as Zuma kan wees, maar onse (huidige) president is nie so onskuldig in die grondkwessie nie. Hy is ook nie in ’n penarie ingedwing soos wat Max beweer nie. Inteendeel, die wyse waarop Ramaphosa optree en verklarings uitreik, laat dit juis lyk asof hy die vader van die idee van grondonteiening is. Natuurlik altyd met die gepaardgaande paaiery, net soos Max die gehoor op Vinpro se inligtingsdag probeer paai het.
Die klein verandering wat volgens Max aan die Grondwet gemaak gaan word, kan groter gevolge inhou as wat hy wil erken. As die opstokers, populiste en armes, soos hy dit stel, eers bloed geruik het, kan die gevolge baie groter as ’n klein verandering aan die Grondwet wees.
Die president het natuurlik die vermoë om almal wat hy toespreek, aan sy lippe te laat hang, na gelang van wie sy gehoor is. Radikaal op ’n ANC-konferensie, dog paaiend en tegemoetkomend wanneer sakelui en boere na hom luister.
Intussen moet ons wonder oor die meevallertjie van R500 000 wat deur Bosasa na die president gekanaliseer is. Ramaphosa is vuur en vlam om die kwessie op te klaar deur met die openbare beskermer samesprekings te voer. Se voet, hy moet voor die Zondo-kommissie getuig.
Ek hou veel meer daarvan om my vyand in die oë te kyk as dat my rug deur ’n “vriend” gekrap word wat terselfdertyd op my skoen piepie. IZAK SMALMAN Potchefstroom