Nuwe Kuhn-spuit verskuif grense
Kuhn het ’n nuwe hoogloopspuit gebou wat reeds ’n stewige vasstrapplek op die Suid-Afrikaanse mark gekry het. Valtrac, ’n betroubare verskaffer van landboutoerusting, versprei dié spuit.
Danksy ’n balk van 36 m wat van aluminium vervaardig is, is die Kuhn Stronger HD 4000 ’n indrukwekkende werktuig.
Die elektroniese Bosch-aandryfstelsel is die opwindendste en mees revolusionêre kenmerk van hierdie spuit. Dit is die eerste spuit wat alles van wielglip, enjinomwentelinge en pompdruk met dié bedryfstelsel beheer.
Die moderne Trimble-GPSstelsel is op ’n Android-platform gebou. Trimble se herhaalbaarheid is uitstekend ‒ die spuit trap elke keer in sy vorige spore.
Die balk van 36 m werk goed saam met die planter van 12 m en bring minder tyd as die vorige spuit tussen die gewasse deur.
Die Stronger 4000 se dieselverbruik is ook drasties minder as dié van sy voorganger.
Die spuitbalk se seksiebeheer is in nege dele verdeel, en elke segment van 4 m funksioneer onafhanklik. Die spuitstoftoevoer word dus dadelik afgesluit, en geen vloeistof loop onnodig in die stelsel af nie.
SPUITKOP
Valtrac bied ook ’n revolusionêre tweespuitkopstelsel. Kuhn het hierdie goedkoop opsie ontwikkel, en dit kan op bestelling bygevoeg word. Wanneer die spuit stadig ry, word die fyner spuitkop geaktiveer, en wanneer dit versnel, skakel dit oor na die groter spuitkop om meer spuitstof toe te dien.
Albei spuitkoppe word saam geaktiveer teen ’n nóg hoër spoed of wanneer hoë volumes toegedien moet word. Dit verseker eenvormige druppelgrootte teen verskillende werksnelhede. Die stelsel kos sowat ’n derde van ander tegnologie wat dieselfde funksie verrig. Boonop is die onderhoudskoste laer omdat ’n mens steeds jou standaardspuitkoppe kan gebruik. Dit werk verbasend goed en verseker ’n baie egalige toediening. Die sproeikoppe steek ook nie onder die balk uit nie.
Die balk word stabiel gehou deur Kuhn se swewende- balk-ewewigmontering. Die olieversameltenk en ’n terugskietveer aan die balk werk saam om skade tot die minimum te beperk indien die balk ’n hindernis sou tref.
ONDERDELE
Die Stronger 4000 se onderdele wat met spuitstof in aanraking kom, is van vlekvrye staal gemaak. Dit sluit in die 4 000-liter tenk en die sentrifugale pomp, wat 600 liter per minuut verplaas. Die vlekvryestaaltenk hou langer as ’n plastiektenk en kraak ook nie so maklik nie. Dit is ook vinniger om ’n vlekvryestaaltenk skoon te maak omdat niks in die staal kan intrek nie.
Die 4 000 liter-tenk verminder die aantal volmaakritte, wat baie tyd en brandstof bespaar. Om die spuitkoppe en pype nog langer te laat hou, het die Kuhn HD-reeks ’n 400 liter-skoonwatertenk wat aan die einde van ’n skof gebruik word om die hele tenk en spuitstelsel uit te was.
Dié moderne werktuig is ten volle vierwielaangedrewe en die wiele word hidroulies aangedryf. Al die onderdele van die hidrouliese stelsel word elektronies beheer. Die wielglip op elke wiel word afsonderlik beheer. Wanneer een wiel begin gly, word die olievloei na die wiel se pomp verminder totdat die wielglip oor ál die wiele weer gebalanseerd is. Dieselfde geld as jy rem ‒ dan tree die hidrouliese sluitweerremstelsel in werking.
WERKVERRIGTING
’n Intelligente, hidrostatiese ratkas verseker dat die regte hoeveelheid krag deurgaans na die gevorderde spuitstelsel oorgedra word.
Die spuit het nie ’n voetpedaal nie en alles word met ’n stuurstok gedoen. As die stuurstok vorentoe gedruk word, begin die enjin teen 1600 omwentelinge draai. Namate die spoed verhoog en meer krag nodig is, word die omwentelinge meer. Gevolglik is die Stronger 4000 lig op brandstof.
Om te rem, word die stuurstok teruggetrek. Die balk se funksies word ook met knoppies op en langs die stuurstok beheer. Op die pad handhaaf die spuit maklik ’n spoed van 30 km/h, en in die lande is 15 km/h ’n doeltreffende, gemaklike spuitspoed.
Vir boere wat lugtig is vir al die elektroniese tegnologie, is daar ’n meganiese drukmeter aan die buitekant van die kajuit wat uit die sitplek dopgehou kan word. Die sigbaarheid vanuit die kajuit is beter as dié van vorige modelle, en die lugkussing onder die operateur se sitplek verseker ure se gerief. Die wielwydte kan ook hidroulies vanuit die kajuit verstel word. Die grondvryhoogte is 1,8 m.
NAVRAE: Mnr. Attie de Villiers, e-pos: attiedev@valtrac.co.za; 083 261 9863 of 056 817 7308.