Dié week in die landbou
BIELIEPAMPOENSEISOEN
Mnr. Jacob du Plessis van Vyeboom by sy pampoen van 601,8 kg, vanjaar se wenner op die reuse-pampoenfees wat verlede naweek op Heidelberg in die Wes-Kaap gehou is. Dit is weliswaar 11,2 kg ligter as die 613 kg-bielie van mnr.
Peet Joubert van Centurion, wat dieselfde naweek op die Walkervillelandbouskou in Gauteng aangeteken is, maar Du Plessis het met sy inskrywing bewys aanhouer wen, want dit was die derde keer dat hy aan die kompetisie deelgeneem het. “My vorige beste was in 2017, toe ek ’n vierde plek met my pampoen van 300 kg behaal het.” Die kompetisie is deur Shoprite en Checkers geborg.
KORTGEKNIP
Die ad hoc-komitee wat opdrag gekry het om ’n wetswysiging wat onteiening sonder vergoeding moontlik maak, in die Grondwet in te skryf, het nie tyd om sy werk te voltooi voor die parlement op 20 Maart verdaag nie. Me. Thoko Didiza, komiteevoorsitter, beveel in haar komiteeverslag aan dat die parlement ná die algemene verkiesing op 8 Mei die wysiging van artikel 25 van die Grondwet finaliseer. Die komitee het op 12 Februarie met sy werk begin en verskeie kenners oor grondhervor-
ming en die Grondwet geraadpleeg oor die wetswysiging se bewoording.
KAAPS ED RAAI
Future Farmers, die internskapprojek wat sedert 2006 jong swart mense op werk in die landbou voorberei, het onlangs ’n tak in die Paarl geopen. Me. Judy Stuart, wat die organisasie uit Howick in KwaZulu-Natal bedryf, sê al hoe meer jong mense het van die Wes-Kaap af Howick toe gegaan om deel van hul projek te word.
Me. Nako Ndima, bestuurder van die kantoor in die Paarl, sê verskeie kan- didate het spesifiek in gewasse soos druiwe, bessies of kernvrugte belang gestel, waarvoor daar nie plase in KwaZulu-Natal beskikbaar is nie. Só het die idee ontstaan om ’n kantoor in die Wes-Kaap te open. Belangstellendes kan die kantoor kontak by 060 550 8729.
APATIESE STAAT
Die avokadobedryf se hoop dat die onderskepping van onvolwasse vrugte op varsproduktemarkte die diefstal en onwettige handel in dié vrugte sou stopsit, is verydel toe die departement van landbou, bosbou en visserye onlangs toestemming gegee het dat só ’n verdagte vrag verkoop word. Dit is nadat die persoon wat die vrugte probeer verkoop het, aangevoer het hy het dit op ’n regmatige manier bekom. Mnr. Edrean Ernst, Letaba-verteenwoordiger van die Suid-Afrikaanse Avokadokwekersvereniging, het op ’n vergadering van die Letaba-avokadostudiegroep gesê dit beteken boere is op hulself aangewese om hul oeste te beskerm. Landbouweekblad berig meer hieroor in ’n volgende uitgawe.
DORS GELES
Boere in die Overberg, waar 40 mm tot 400 mm reën gedurende swaar storms vroeg verlede week geval het, meen die aanpassing van boere se grondbewerkingspraktyke het daartoe bygedra dat die reën minder spoelskade veroorsaak het. Mnr. Johan Lusse, graandienstebestuurder by Overberg Agri, sê boere in die gebied bewerk hul grond minder, en dit lei daartoe dat meer vog behou word en die kans op verspoelings kleiner is. Hy sê die reënval is goeie nuus vir ondergrondse vogvlakke, veral vir boere wat nou reeds droëlandweidingsgewasse aanplant.
SOVEREIGN BREI UIT
Sovereign Foods, Suid-Afrika se derde grootste hoenderprodusent, het ’n meerderheidsbelang bekom in die Oos-Kaapse Cold Storage Group (CSG), ’n groothandelaar van pluimveeprodukte en waardetoegevoegde pluimveeprodukte. CSG versprei, verkoop en verskaf produkte aan kleinhandelaars en instapkliënte op verskillende plekke in die Oos-Kaap. Sovereign het by navraag gesê die transaksie hou meer voordele uit ’n verspreidingsoogpunt in as uit ’n produksie-oogpunt. Sovereign slag 1 miljoen hoenders per week in Uitenhage en 600 000 hoenders per week in Hartbeespoort.
KOOP KLEIN
Die supermarkgroep Pick n Pay gaan spesiaal winkelruimte afstaan aan produkte wat deur klein besighede geproduseer is. “Ons wil dit vir klante makliker maak om klein plaaslike besighede te ondersteun. Dié unieke platform sal ons klein verskaffers bekend stel en klante meer oor hul besigheid vertel,” het mnr. Adrian Naudé, die uitvoerende groephoof vir hipermarkte, op die bekendstelling by die Pick n Pay-hipermark in Brackenfell gesê. Die webwerf Good Things Guy haal die maatskappy se transformasiedirekteur, me. Suzanne Ackerman-Berman, aan wat sê Pick n Pay “glo kleinhandelaars moet ’n volhoubare ‘dam’ skep waarin entrepreneurs kan ‘visvang’.”