KEER KORING TERUG NA DIE VRYSTAAT?

SOMMIGE boere in die sentrale en westelike dele van die Vrystaat, soos Hoopstad en Bultfontein, het op Graan SA se jaarkongres by Bothaville aangedui hulle oorweeg dit om koring te plant, mits hulle genoeg reën voor die winter kry.

Mnr. Johan van den Berg, klimatoloog by Santam Landbou, meen dit kan ’n hoë risiko inhou in die lig daarvan dat talle boere

weens te min grondvog nie somergraan kon aanplant nie.

Hy meen produsente moet hulself versigtig afvra of koring die oplossing in ’n moeilike produksiejaar is. Hy sê genoeg grondvog moet altyd die eerste oorweging voor planttyd wees. “Die grondvog is gewoonlik nie voldoende om goeie oeste te lewer sonder reën in September en/of Oktober nie.

“In die laaste twee dekades lyk dit of die reënvalpatroon geskuif het, en kom minder reën in die lente voor. Verder is rypskade ’n groot risiko. Swaar ryp het veral die afgelope paar seisoene voorgekom.”

Van den Berg sê hoewel die insetkoste vir koring waarskynlik laer is as vir die meeste somergewasse, word die produksierisiko groter.

“’n Bykomende risiko wat al hoe ernstiger word, is die skade wat deur rooibekkweleas veroorsaak word. Daar moet dus mooi besin word of koring die oplossing is vir ’n swak inkomste uit somergraan.”

PRYSE EN INVOER

Dr. Werner Rossouw, graanhandelaar en voorsitter van Silostrat, sê dié moontlike aanplantings behoort nie ’n beduidende impak op koringpryse te hê nie, omdat Suid-Afrika in drie van die afgelope vier jaar meer koring invoer as wat plaaslik geproduseer word.

“Ons gaan by invoerpariteitsvlakke moet bly verhandel omdat die moontlike verwagte styging in aanplantings nie genoeg sal wees vir plaaslike verbruik nie. Ons kan potensieel minder koring invoer, maar Suid-Afrika gaan steeds ’n netto invoerder van koring wees.”