Onteiening sonder vergoeding ‘gebeur voor ons oë’
“ALMAL is bekommerd oor grondonteiening sonder vergoeding, maar dit gebeur reeds voor ons oë,” het mnr. Egon Zunckel, ondervoorsitter van die KwaZulu-Natalse geenbewerkingsklub, gesê op die herlewingslandboukonferensie op Ottosdal, wat Landbouweekblad met die samewerking van Graan SA en die Ottosdal-geenbewerkingsklub aangebied het.
Zunckel het aan konferensiegangers foto’s vertoon van erge gronderosie wat hy in die distrik Viljoenskroon in die Vrystaat geneem het. “Ons grond gaan voor ons oë verlore en ons doen nie iets daaraan nie.”
Zunckel pas reeds 22 jaar geenbewerkingspraktyke op sy plaas by Bergville in KwaZuluNatal toe. Hy boer ook in die distrik Warden in die Vrystaat. Danksy die sukses wat hy reeds op sy plaas by Bergville gesien het, het hy nog nooit swaarmoedig van sy plaas by Warden weggegaan nie. “Ek het geweet ons gaan dit in die Vrystaat ook regkry.”
Sy geenbewerkingsboerdery het begin toe hy een jaar haastig was om te plant, en vinnig sy mielies in koringstoppels geplant het. Daardie mielies het sowat 2 ton/ha meer gelewer as die mielies wat konvensioneel aangeplant is. “Ek het myself afgevra, wat gaan hier aan?”
DAAR ÍS HULP
Boere wat na herlewingsboerderymetodes oorskakel, kan verwag om die wind van voor te kry van skeptici en doemprofete.
Dít was die boodskap van prof. Buz Kloot van die Universiteit van Suid-Carolina by Landbouweekblad en die Riemland-studiegroep se herlewingslandboukonferensie op Reitz.
“Eers het hulle gesê ons me- todes is onwetenskaplik, toe dat ons nie genoeg data het nie, of dat dit nie by hulle sal werk nie.”
Toe Kloot-hulle begin het om data te wys, het die skeptici gesê die data is nie willekeurig ingesamel nie, of daar is nie genoeg herhalings van die proewe gedoen nie. Daar is ook gesê die boerderymetodes wat hulle toepas, is gevaarlik en onverantwoordelik, bloot oulike demonstrasiepersele, of net eenvoudig verkeerd.
’n Ander weergawe van “dit sal nie hier werk nie”, is dat skeptici sê die lande waar herlewingslandbou resultate toon, is spesiale gevalle.
Kloot het egter bygevoeg boere wat wil verander, sal ondersteuning kry. Hy moedig hulle aan om by groepe soos die Riemland-studiegroep aan te sluit.