Paramount hoes R1,3m. in mieliemeel-kartelsaak
DIE dertiende maatskappy in die Mededingingskommissie se jare lange saak oor beweerde kartelbedrywighede in die meulenaarsbedryf het geskik om ’n boete te betaal.
Paramount Mills erken in die skikkingsooreenkoms dat hy by kartelbedrywighede in die meulenaarsbedryf vir witmieliemeel betrokke was en gaan ’n administratiewe boete van R1 320 819 betaal, luidens ’n verklaring deur die Mededingingstribunaal. Die tribunaal het die ooreenkoms tussen die kommissie en Paramount Mills op 13 Maart bekragtig.
Luidens die skikkingsdokumente het verteenwoordigers van Paramount van 1999 tot
2006 vergaderings bygewoon en aan telefoongesprekke deelgeneem waartydens met mededingers ooreengekom is om die verkoopprys van gemaalde witmielieprodukte vas te stel, datums vasgestel is waarop sulke ooreengekome prysverhogings sou intree, en inligting oor prysstrukture uitgeruil is.
Ingevolge die skikkingsooreenkoms sal Paramount die helfte van die boete binne tien dae betaal en die res in 12 paaiemente. Die kommissie sal die geld aan die staatskas betaal, soos wat die Wet op Mededinging bepaal.
GEE SAMEWERKING
Paramount het ooreengekom oms y volle samewerking aan die kommissie te gee in die vervolging van die oorblywende twee respondente in die saak.
Paramount sal ook ’n program vir die nakoming van mededin- gingswetgewing ontwikkel, in werking stel en monitor.
Die kommissie het luidens die verklaring in Maart 2007 begin ondersoek of Tiger Brands, Pioneer Foods, Foodcorp, Pride Mil-
ling en Progress Milling mededingingswetgewing oortree het.
Dit was nadat Premier in 2007 ’n aansoek om korporatiewe toegeeflikheid ingedien het. Tiger Brands het later daardie jaar ook so ’n aansoek ingedien. Volgens die kommissie se beleid oor sulke aansoeke kan ’n lid van ’n kartel inligting oor ’n kartel openbaar maak in ruil vir immuniteit teen vervolging en boetes.
Nog meulenaars is later ondersoek.
Die maatskappye wat sedert 2010 skikkings met die kommissie aangegaan en boetes betaal het, is Keystone Milling, Pioneer Foods, Carolina Rollermeule, Foodcorp, Blinkwater Mills, Bothaville Milling, Brenner Mills, Pride Milling, Godrich Flour Mills, Progress Milling, TWK Milling en NTK Limpopo Agri.