INTERNASIONALE LANDBOUNUUS
1 ISRAEL | Vreugde oor goeie reën
Die See van Galilea, Israel se enigste bron van vars oppervlakwater, het sedert Oktober met nagenoeg twee meter gestyg. Tog het die see se vlak eers einde Februarie gestyg tot bo die rooilynvlak. Geen water word uit die see gepomp wanneer die vlak tot onder dié lyn daal nie.
Die land se reënseisoen is nog nie heeltemal verby nie, maar dele in die noorde het reeds 110% tot 120% van hul jaarlikse reënval gehad. In die omgewing van Jerusalem het tussen 80% en 85% van die jaarlikse gemiddelde geval, en in die Negev tussen 50% en 70%.
Die goeie reën het ook die ondergrondse waterbronne goed aangevul.
Die land se waterowerheid het gevolglik watertoewysings aan boere met 47 miljoen kubieke meter verhoog. Hiervan was 18 miljoen aan boere rondom die See van Galilea. Omgewingsgroepe sê groot watertoewysings aan boerderye het watertoevoer na die gebied se strome en fonteine laat afneem. — Haaretz
2 AMERIKA | Groot kommer oor ‘Frankenvis’
Die Amerikaanse voedsel- en medisyne-owerheid het ’n invoerverbod op ’n omstrede handelsmerk van geneties gemanipuleerde salm opgehef.
Dit het byna onmiddellik gelei tot ’n hofaansoek deur ’n koalisie van verbruikers-, omgewings- en visserygroepe, wat geëis het dat dié goedkeuring opgehef word.
AquaAdvantage-salm is geneties gemanipuleer om heeljaar te groei en kan dus twee maal vinniger as gewone salm die mark bereik. Dit is aanvanklik in 2015 goedgekeur, maar wetgewing wat in 2016 deur die Amerikaanse kongres goedgekeur is, het die etikettering van sulke vis verpligtend gemaak. Die standaarde is eers laat in 2018 deur die Amerikaanse departement van landbou afgehandel.
Die aandeelprys van die maatskappy, wie se vis deur sommige antiGM-groepe “Frankenfish” genoem word, het kort ná die aankondiging meer as verdubbel. — Gizmodo
3 FILIPPYNE | Grondbesetters met die dood gedreig
Die Filippynse president, mnr. Rodrigo Roa Duterte, het grondbesetters wat boere vermoor, met die dood gedreig. Hy het gesê diegene wat grond wil hê, moet wag vir die regering se grondhervormingsprogram om grond aan hulle toe te ken.
Duterte het gesê hy sal die weermag opdrag gee om gewapende grondbesetters dood te maak.
Hy het dié uitsprake gemaak op ’n geleentheid in die distrik Sagay, in die provinsie Negros Occidental, waar sertifikate van grondbesit aan begunstigdes van die grondhervormingsprogram oorgedra is.
Duterte het gesê hy is vol vertroue dat welgestelde grondeienaars die staat se grondhervormingsprogram sal steun. Hy het sy kommer uitgespreek oor die beweerde betrokkenheid van rebelle in die moord op suikerboere in dié gebied verlede jaar. — Manila Bulletin
■ Die migrasie van Afrika se bevolking vanaf die platteland na stedelike gebiede gaan volstoom voort.
■ Mense wat voorheen grootliks selfversorgend was danksy bestaansboerdery, verwag nou van regerings om bekostigbare en toeganklike voedselbronne aan hulle te verskaf
■ ’n Aktiewe kommersiële landbousektor is die enigste hoop wat regerings het om in dié vereiste van hul bevolkings te voorsien.