WAT IS FRUITLOOK?

Meer as 750 gebruikers, waarvan sowat driewart boere is, gebruik dié aanlyn program, ’n uitvloeisel van GrapeLook, vir beter waterbestuur en slimmer besproeiing. Mnr. Ruben Goudriaan sê hoewel die Fruitlook-beginsel tegnologies hoogs gevorderd is, kom dit neer op satellietbeelde wat saam met klimaatinligting gebruik word om kaarte te skep.

As produsente data evalueer saam met boord- en wingerdinligting, soos kultivaren grondeienskappe, en bestuurspraktyke, gee dit ’n geheelbeeld van ’n produsent se besproeiing en produksie. Dit verskaf talle vlakke van inligting deur verskillende kaarte van onder meer die waterverbruik in ’n voorafgaande week, of daar watertekorte was, en die hoeveelheid biomassa geproduseer. Data vir die volledige seisoen word aangedui, en omdat meer as een jaar se inligting beskikbaar is, bied dit ook ’n terugblik op vorige seisoene.

In die verlede het die projek oor 30 weke gestrek tydens die besproeiingseisoen in die Wes-Kaap, van 1 Oktober tot 30 April, maar vanaf die 2018-’19-seisoen word 12 maande se inligting ingesamel.

Tydens die groeiseisoen kry produsente weekliks inligting van ’n webwerf af.

Satellietdata van onder meer Amerika en Europa word in kombinasie met mekaar gebruik. Fruitlook word deur die Wes-Kaapse departement van landbou gefinansier.