Nuwe gewasse vir Wes-Kaap gesoek
Alternatiewe gewasse of verbeterde kultivars van bestaande gewasse moet deurlopend ondersoek word sodat produkte kan tred hou met produsente se werklikhede en die behoeftes van die mark.
Wes-Kaapse graanprodusente moet verskeie probleme trotseer. Weens die opeenvolgende droë produksiejare, lae opbrengste en die kosteknyptang raak dit ál moeiliker vir boere om ekonomies te oorleef.
Gevolglik het die behoefte ontstaan om te soek na moontlike alternatiewe gewasse of verbeterde kultivars van die bestaande gewasse. Breëblaargewasse en gewasse wat stikstof bind, is noodsaaklik binne ’n suksesvolle wisselboustelsel met koring. Dus val die klem op sulke gewasse. Die saad dien as ’n bron van proteïene vir ’n groeiende wêreldbevolking, asook as dierevoeding.
Proteïene kan ook op dekgewasse geproduseer word. Met die insluiting van dekgewasse in rotasiestelsels, kan meer diere vir korter tye gedra word. Dit lei tot ’n verhoogde vleisproduksie. Die TABEL toon ’n lys van die verskillende opsies met moontlike
voor- en nadele vir Wes-Kaapse toestande. Al die gewasse word reeds verbou of is al in die verlede in die Wes-Kaap getoets. Verbeterde kultivars wat beter aangepas is en ’n hoër produksie lewer, is jaarliks op die mark beskikbaar. Markte word groter en nuwe markte word deurlopend ontwikkel. Dus moet nuwe gewasse en kultivars deurlopend getoets word ten einde volhoubare opsies aan produsente te bied.
BEKAMP ONKRUID
Die bekamping van onkruid is ’n groot struikelblok in die WesKaap. Die onkruiddruk weens onkruiddoderweerstand en verkeerde verbouingspraktyke veroorsaak talle probleme vir produsente.
Geen geregistreerde chemiese produkte vir gebruik by kekerertjies, lensies, fababone en voererte is in Suid-Afrika beskikbaar nie. Daarom is die registrasie van chemiese middels vir die verbouing van dié peulgewasse belangrik.
NUWE KULTIVARS
Weens die topografie van die landskap is dit baie moeilik om gewasse, soos kekerertjies en lensies, aan te plant omdat hulle laag groei en dus moeilik oes. Dié gewasse verkies swaarder grond en reënval van meer as 300 mm per jaar. Hierdie gewasse kan in sekere gebiede aard, maar sal nie as algemene wisselbou-opsie beskikbaar wees saam met die huidige kultivars nie. Hoewel kanola aanvanklik nie in sandgrond geaard het nie, is dit nou moontlik danksy nuwe kultivars.
WEERSTANDIGHEID
Voererte is goed aangepas in die Wes-Kaap en bied baie opsies vir die bekamping van onkruid.
Voererte oes egter ook moeilik, soos kekerertjies en lensies. Hoewel dit hoog groei, gaan die plant net voor oestyd lê. Maniere moet ondersoek word waarop die plante regop gehou kan word waar dit in mengsels met graan of kanola geplant word.
Fababone en voererte is baie vatbaar vir siektes. Die goeie bekamping daarvan saam met die regte kultivars, wisselbou en chemiese middels is noodsaaklik. Fababone is geneig om laat in die produksiejaar ryp te word. Dus moet kultivars gesoek word wat beter by die Suid-Afrikaanse klimaat aangepas is.
Die stryd lê daarin om van dié kultivars in die hande te kry sodat dit in verskillende gebiede getoets kan word. Die Wes-Kaapse departement van landbou en Graan SA praat reeds oor moontlikhede om van hierdie gewasse na Suid-Afrika te bring sodat dit getoets kan word.