BYNA 500 RAMME OP EEN SLAG VERKOOP
’n Allemintige 499 Merinoramme – die meeste nóg op een veiling in Suid-Afrika – is op Konsortium-Merino se 36ste produksieveiling op die plaas Dombietersfontein verkoop.
Daarmee het Konsortium die vorige rekord van die meeste ramme wat op ’n veiling verkoop is (472), verbeter. Dié rekord is ook deur hierdie telersgroep gehou.
Volgens me. Madelaine van Heerden, woordvoerder van Konsortium, was die pryse op die onlangse veiling nie buitensporig hoog nie. Sy het benadruk
dat die groep nie hoë pryse najaag nie en dat die groter aanbod pryse afbring.
Verlede jaar was daar net sewe veilings waarop meer as 100 ramme aangebied is – vyf van daardie veilings is deur telers van die Konsortium-groep aangebied. “Ten minste is daar nou ’n hele paar gelukkige kopers wat ramme teen bekostigbare pryse te midde van die droogte gekry het,” het sy aan Landbouweekblad gesê.
Die totale aanbod van 499 ramme op Dombietersfontein is teen gemiddeld R7 402 verkoop. Op die “geraasveiling” in die skeerhok is altesame 205 ramme teen gemiddeld R10 270 verkoop en op die stil veiling het 294 ramme gemiddeld R5 403 behaal. Hulle is in lotte verkoop.
Altesame 1 074 ooie is teen gemiddeld R2 251 verkoop. Die hoogste prys was R2 650 elk vir ’n groep handelsmerkooie. Mnr. Piet Schoeman van Langkloof Plase, Oudtshoorn, het hulle gekoop.
GWK het die veiling aangebied.