Wintergraan
Elke jaar op die derde Woensdag in Januarie kom boere van heinde en ver op Balfour in Mpumalanga byeen om self te sien hoe hooimaaktoerusting doeltreffend en optimaal benut kan word. Boonop is daar hope pret en plesier vir die hele gesin.
Een v anS uid-Afrika se grootste boeredae, die B alfo u r-hooidag, is vroeër vanjaar vir die agtste keer aangebied.
Sowat 1 000 besoekers het die dag bygewoon.
Mnr. Derick Kuun, voorsitter van die Balfour-boerevereniging, wat die geleentheid aanbied, sê die belangrikste aspek van dié dag is die geleentheid wat dit skep vir onderlinge steun aan boere.
“Vir ons as boerevereniging is dit ’n manier om iets vir ons gemeenskap te doen. Dit help ook dat boere, wat vanjaar ’n baie moeilike seisoen beleef, saamstaan en mekaar moed inpraat. Boere maak mekaar sterk wanneer hulle oor hul probleme kan praat.”
Tien werktuigmaatskappye het demonstrasies aangebied van onder meer balers, misstrooiers, snymasjiene en harke. Die telersgenootskappe van verskeie skaap- en beesrasse was onder nog veertien ander uitstallers.
Die hooidag bestaan hoofsaaklik uit demonstrasies van verskeie maatskappye se hooimaaktoerusting. Konsultante van die uitstallers en deelnemers beantwoord ook boere se vrae ná die demonstrasies.
Die hooidag is agt jaar gelede begin nadat boere in die omgewing van Balfour laat blyk het hulle wil graag alle hooitoerusting op een dag en een plek in aksie sien, sê mnr. Gert Kriek, lid van die hooidagkomitee.
“Die eerste hooidag is toe suksesvol op ons familieplaas, Palmietfontein, aangebied.”
Die hooidag word sedertdien elke jaar aangebied oorkant die AFGRI-Palmietfontein-bunker, by PJ Kriek en Seuns, wat op dieselfde grond geleë is. Dié perseel ist ussen vier dorpe en gerieflik teen die hoofpad geleë.
“Al tien die groot maatskappye wat hooitoerusting betref, het demonstrasies aangebied. Dit is vir ons ’n voorreg om die grootste hooidag in die land aan te bied,” sê Kriek.
Die hooidag word op die derde Woensdag van Januarie gehou omdat dit ’n warm en droë tyd op die Hoëveld is – ideaal vir hooimaak.
“Met die eerste hooidag het ons gedink slegs ons eie lede in die omgewing sal dit bywoon. Ons was aangenaam verras toe heelwat meer boere vanuit ander omgewings ook die waarde van die dag besef en opgedaag het,” sê Kriek.
Die hooidag het klein
begin met 35 mense en drie maatskappye. Vanjaar het mense van Limpopo af en selfs boere van Ceres in die Wes-Kaap die boeredag bygewoon.
AFGRI
Mnr. Tinus Prinsloo, uitvoerende hoof van AFGRI, wat vanjaar weer die hoofborg was, sê dié boeredag is ’n goeie geleentheid om demonstrasies van al die nuutste en beste hooimaaktoerusting op een plek te sien.
Hy sê dit is belangrik dat AFGRI betrokke is by boeredae soos die hooidag, want die maatskappy wil graag iets teruggee aan die gemeenskap.
“Ons sal in die toekoms steeds by die hooidag betrokke wil wees. Ná al die demonstrasies is dit lekker om saam met die omgewing se boere te kuier. Die boeredag was ’n reusesukses.”
JOHN DEERE
Mnr. Kevin Lesser, bemarkingsen-kommunikasiebestuurder by John Deere, sê die hooidag was baie goed georganiseer.
“Selfs al is dit ’n droë jaar in groot dele van Suid-Afrika se primêre hooiproduksiegebiede, was daar groot belangstelling en die opkoms was baie goed.
“Dit was ’n gulde geleentheid waar ons regstreeks met boere kon gesels. Ons waardeer enige geleentheid waartydens ons sterker bande met ons kopers kan bou en hul terugvoering kan ontvang.
“Die boodskap aan ons was duidelik dat boere baie waarde put uit demonstrasiedae, soos die hooidag,” sê Lesser.
NEW HOLLAND
Mnr. André Nieuwoudt van Agriquip in Heidelberg, Gau- teng, New Holland se handelaar in die streek, meen ook die hooidag was goed georganiseer. New Holland is een van die maatskappye wat van die begin af by die hooidag betrokke is.
“Die opkoms van boere is besonder hoog, en selfs boere uit die Noord-Kaap was teenwoordig.
“Die dag was ’n groot sukses. Meer boere het vanjaar ná die demonstrasies teruggekom met nog vrae en belangstelling. Die terugvoering wat ons gekry het, is dat boere beïndruk is met ons produkte.”