LANDBOUNUUS UIT AFRIKA
1 ZIMBABWE | Theilerose maai onder beeskuddes
Tekorte aan buitelandse valuta om dipmiddels aan te koop, is besig om die Zimbabwiese beesvleis- en melkbedryf se stryd teen theileriose lam te lê.
Nagenoeg 50 000 beeste het verlede jaar aan dié bosluisoordraagbare siekte gevrek, en die kommunale en kommersiële sektor is ewe kwesbaar daarvoor.
Volgens dr. Unesu UshewokunzeObatolu, hoofdirekteur van die Zimbabwiese departement veeartsenykundige dienste, moet alle nodige enten dipstowwe ingevoer word.
“Wanneer die dip van beeste doeltreffend is, verdwyn die siekte. Die situasie word egter omgedraai wanneer behandelings oorgeslaan word omdat die chemikalieë nie beskikbaar is nie, of wanneer die dipkonsentrasie nie na wens is nie,” sê sy. Daar is planne om dip- en entstowwe plaaslik te vervaardig.
— The Sunday Mail
2 NIGERIË | Afrika se grootste rysprodusent
Mnr. Audu Ogbeh, Nigeriese minister van landbou, sê dié land is nou Afrika se grootste rysprodusent danksy die huidige, goeie landboubeleid van sy regering.
Hy skryf die sukses toe aan ’n gesamentlike landbou-beleggingsplan van die staat en die privaat sektor wat hom ten doel stel om Nigerië selfvoorsienend te maak wat voedsel betref.
Nigerië het Egipte onlangs verbygesteek as Afrika se grootste rysprodusent met sy jaarlikse oes van 4 miljoen ton, het Ogbeh gesê.
Egipte se jaarlikse oes was 4,3 miljoen ton, maar dit het skerp afgeneem weens die nuwe regeringsbeleid wat waterverbruik met amper 40% verminder het.
— Independent