Genootskap ondersteun só sy lede
Die Limousin-beestelersgenootskap lewer verskeie praktiese en administratiewe dienste wat telers ondersteun, en stoeterye se bestuur en registrasie van diere vergemaklik.
Op vanjaar se Bloemskou in Bloemfontein vind een van die hoogtepunte op die Limousin-kalender plaas, naamlik die genootskap se nasionale skou op 1 en 2 Mei.
Die gehalte van Limousins op skoue dien as toonvenster vir die teler én die ras. Dit reflekteer deels op die teelsukses van ’n stoetery, asook die waarde wat die ras vir kommersiële vleisprodusente kan toevoeg. Met die genootskap se hulp en ondersteuning kan telers klem lê op die bestuur van hul kuddes, terwyl die genootskap administratiewe take en die verwerking van data hanteer.
Mnr. Stefan Gerber van Stellenbosch, eienaar van die NEB Limousin-stoetery en ’n bekende
in wynkringe, is die genootskap se president. Die rasdirekteur, mnr. Martin van Rooyen, is in 2017 aangestel en help om die genootskap te bestuur en lede te ondersteun vanuit Bloemfontein.
LEDEDIENSTE
Die finansiële bestuur van die genootskap is ’n uiters belangrike bestuursfunksie, want sonder ’n gesonde bankbalans is geen dienste moontlik nie.
“Ons gee noukeurig aandag aan enige uitgawes wat ons namens die genootskap en sy lede aangaan,” sê Van Rooyen.
Van Rooyen en die genootskap se administratiewe klerk, me. Melissa Blom, behartig die data-aantekeninge, onder meer die geboorte van kalwers en stamboomregisters. Breedplan help om die teelwaardes te bepaal, wat lede kan gebruik.
Die genomikaprojek waaraan die Limousin-beestelersgenootskap deelneem, verg noukeurige administrasie en die akkurate opneem van inligting.
“Ons help ook ons lede tydens skoutye met logistieke reëlings, waaronder die organisering, saamstel van die skoukatalogus en werwing van borge om skougeleenthede spesiaal te maak.”
Die genootskap bied ook ondersteuning op veilings.
“Ons raai ons lede aan om hul veilings onder die beskerming van die genootskap aan te bied. Die genootskap werk dan saam met die teler om sy veilingskatalogus op te stel.”
Diere se produksie- en reproduksiesyfers word nagegaan om te bepaal of Limousins in aanbod op standaard is. Diere wat nie aan standaarde voldoen nie, sal nie in die katalogus onder beskerming van die genootskap te koop aangebied word nie.
“Ons kyk ook na die gesondheidsertifikate, en dat diere vry is van beestuberkulose, brucellose en siektes soos vibriose. Al die diere moet getoets wees en ons gaan dié dokumentasie na.”
Vrugbaarheidsertifikate van bulle word ook nagegaan en daar word streng nagegaan dat bulle se spermmonsters ’n minimum van 75% lewende spermselle sonder wesenlike morfologiese afwykings het.
Die doel van al dié sertifikate en toetse vóór veilings is sodat enige teler – hetsy ’n kommersiële teler of stoetteler – wat by ’n veiling onder die beskerming van die genootskap diere koop, weet dat diere wat hy daar koop, op standaard en siektevry is.
“Ons koördineer ook die administrasie en uitvoering van keurings. Die genootskap hanteer ook die insameling van die data na afloop van keuring en terugvoering aan die teler.
“Hierdie koördinering is onlangs verbeter deur die land in streke te verdeel. Wanneer ’n veiling onder die beskerming van die genootskap aangebied word, maak ons seker ’n keurder is teenwoordig wat die diere weer kan keur vóór die veiling om die gehalte van diere te bevestig,” sê Van Rooyen.
Bewusmaking oor die ras en kommunikasie met lede, voornemende lede en kommersiële telers voeg direkte waarde toe vir enige teler.
“Ons probeer om die ras so veel en so wyd as moontlik te bemark. Dit sluit geleenthede soos Nampo in, waar ons op ’n sigbare en direkte manier namens die genootskap en sy lede met belangstellendes skakel.”
Probleemoplossing is ook ’n daaglikse funksie.
“Ons help lede om enige administratiewe foute reg te stel. Akkurate stamboominligitng is baie belangrik vir stoettelers, want oënskynlik klein foutjies kan later van groot belang wees. Akkurate rekords van lede verseker betroubare inligting oor teeldiere, wat winsgewende besluite moontlik maak.”
KOMMUNIKASIE
Van Rooyen bestuur ook ’n WhatsApp-groep waarop kommersiële telers versoeke kan rig.
“Gewoonlik kan ons hulle binne ’n paar dae help met ’n lid in hul omgewing wat hul diere kan koop.
“Dit is merkwaardig hoeveel oproepe en boodskappe met navrae die genootskap elke dag kry. Dit is ’n goeie aanduiding dat die genootskap se lede betrokke is, graag ons dienste wil gebruik en dat die ras in gewildheid toeneem.
“Die genootskap bied ook boeredae en inligtingsessies aan waartydens ons deelnemers beter inlig oor veeverbetering in hul kuddes. Só bly bestaande én potensiële lede in voeling met wat in die telingbedryf en met die ras aangaan.”