Puik teelmateriaal van bekroonde stoetery
Die plaas Water’s Edge front sowat 20 km lank aan die Vaaldam naby Villiers in die Vrystaat, en huisves sedert 1992 die veelbekroonde Devlan Limousin-stoetery.
Devlan Limousins se stoetkudde bestaan uit sowat 600 diere wat aangepas is by die Vrystaat se koue winters en suurveldweidings. Mnr. John Devonport en sy vrou, Tracey, het in 1988 ’n plaas aan die Vaaldam gekoop, en spoedig begin om uitsonderlike beeste te teel. Hulle maak taai diere groot wat siektes en groot skommelings in klimaatsomstandighede kan weerstaan.
Devonport was Breedplan se SA Stoetteler van die Jaar in 2006,
en in 2015 was die kudde die Landbounavorsingsraad se Nasionale Kudde van die Jaar.
Dié stoetery bied ook funksionele doeltreffendheid, aanpasbaarheid en produktiewe diere. Devlan verbeter voortdurend sy genetiese materiaal, ook ten opsigte van internasionale genetiese evaluerings. Die vrugbaarheid van die Devlan-kudde is uitstekend. Uit 200 koeie is die gemiddelde interkalfperiode 372 dae.
Devlan se stoetvee is goed aangepas op die veld, maar maak ook hul merk op skoue en in kompetisies. In 2018 is vyf wenners van goue skoubekers aangewys: Devlan Highlander 12125 (koei), Vryburg- en Thabazimbi-skou;
Devlan Gabriella 114 (koei) en Devlan Influence 13120 (bul), Letaba-skou (Tzaneen); Devlan Effervescent 0935 (koei), Standerton-skou; en Devlan Hearsay 1266 (bul), Bela-Bela-skou. Devlan Effervescent het twee van dié gouebekerwenners, Devlan Gabriella 114 en Devlan Hearsay 1266, geteel. Op die Alpha-skou op Parys is Devlan Limousin as die nasionale wenner van die Skouman van die Jaar aangewys.
In 2016 het die spogkoei Devlan Depth 06123 goue bekers op die Lichtenburg-, Bloemfonteinen Royal-skou gewen, en haar klas getoon deur as die SA opperste interraskampioen op die Alpha-skou in Parys aangewys te word.