DIE ANDER SÊ
DIE enigste manier vir munisipaliteite om uit hul benarde geldelike posisie te kom, is om hul afhanklikheid van Eskom te verminder, sê mnr. Nhlanhla Ngidi, die hoof van energie en elektrisiteit by die Suid-Afrikaanse vereniging vir plaaslike regering (Salga). Ondanks die vereniging se pleidooie aan die regering laat die beleids- en regulatoriese omgewing munisipaliteite nie toe om krag direk van onafhanklike verskaffers te koop nie.
Munisipaliteite se grootste bron van inkomste is die marge wat hulle verdien deur elektrisiteit van Eskom te verkoop. Met die onbetroubare voorsiening en stygende tariewe beraam die kliënte op wie munisipaliteite staatmaak, egter hul eie planne.
“Munisipaliteite is afhanklik van groot nywerheids- en kommersiële kliënte wat besig is om hul eie inisiatiewe vir kragopwekking te ontwikkel. Dit kan rampspoedig vir die inkomste van dié munisipaliteite wees indien hulle nie dié kliënte kan behou as deel van ’n nuwe sakemodel waar ander inkomstestrome geskep kan word nie,” sê Ngidi.
Salga vra die regering al die afgelope drie jaar om die nodige regulatoriese veranderinge te maak. Sonder dié veranderinge bly munisipaliteite vasgekluister aan ’n onvolhoubare sakemodel wat nie meer hul werklikheid weerspieël nie.
Die Stad Kaapstad het onlangs met ’n hofgeding begin waarmee hy die departement van energie wil dwing om hom toe te laat om sy eie krag direk by privaat verskaffers te koop. Salga steun dié stap.