SA WETENSKAPLIKE ONTVANG GESOGTE WATERPRYS
’n Kaapse waterekoloog het die gesogte 2019 Stockholm-prys vir water gewen vir haar deurslaggewende bydrae tot wêreldwye rivierbestuur. Dr. Jackie King was amper 40 jaar lank verbonde aan die Universiteit van Kaapstad, waar sy ’n navorser, dosent en nagraadse studieleier was.
Volgens haar benoeming vir die prys het sy “die wetenskaplike begrip van watervloei bevorder, wat besluitnemers die metodes en middele gegee het om die volle omvang van koste en voordele te beoordeel in die bestuur of ontwikkeling van rivierstelsels”.
Sy spesialiseer in die ontwikkeling van metodes om te bepaal hoeveel water nodig is om riviere se ekostelsels te onderhou, wat gelei het tot die vroeë ontwikkeling van sulke metodes vir Suid-Afrika. Hierdie metodes is vervat in die land se Nasionale Waterwet (Wet 36 van 1998).
Sedert 1997 het sy verskeie wetenskaplike spanne gelei wat die vloedbestuur vir talle van die wêreld se belangrikste rivierstelsels behartig, onder meer die Nyl, Mekong, Indus en Okavango.
Sy was die spanleier van ’n internasionale adviesgroep wat deur die Wêreldbank aangestel is van 2001 tot 2003, en het soortgelyke werk gedoen vir die internasionale navorsingsorganisasie World Fish en die wêreldkommissie vir damme.
Van 2009 tot 2012 het sy die Pakistanse regering raad gegee in ’n dispuut met Indië oor die Kishangangadam in die Himalajas. Sy was ook ’n kundige getuie toe dié geskil in Augustus 2012 deur die internasionale arbitrasiehof in Den Haag aangehoor is.
Sy is in 2010 as een van die eerste lede van die nasionale wateradviesraad aangewys om die Suid-Afrikaanse minister van waterwese te adviseer. Sy is sedert 2012 ’n buitengewone professor aan die Universiteit van die Wes-Kaap.
Sy is ook ’n direkteur van die wêreldnatuurfonds (WWF).