WAPENS: OPLEIDING GAAN JOU RED
Om misdadigers met ’n teenreaksieplan een voor te wees, kan eienaars van vuurwapens nie net die wapen besit nie – hulle moet eintlik opgeleide skuts wees.
Die meeste plaasaanvalle word gepleeg met drie faktore wat in die aanvallers se guns tel: Inligting, getalsoorwig en vuurwapens. Tegnologie soos selfoonen radiowartoestelle (jammers of scramblers) van militêre oorsprong begin ook ’n rol speel, maar sal afsonderlik behandel word en kom nog nie so algemeen voor nie.
Inligting word in die meeste gevalle bekom vóór die misdaad plaasvind, en daar is byna altyd sprake van “binne-inligting” wat óf deur bronne óf deur verkenning ingewin word. Die meeste aanvalle word só beplan dat daar ’n groot getalle-oorwig aan die kant van die aanvallers is. Die aanvallers is ook altyd gewapen en soek meestal na nog vuurwapens.
In dié reeks rubrieke gaan elke faktor van ’n plaasaanval bespreek en ingespan
word om ’n teenreaksieplan te ontwikkel.
In dié rubriek gaan dit om korrek bewapen en ten volle voorbereid te wees.
Die Wet op die Beheer van Vuurwapens (Wet 60 van 2000) bepaal dat: Licence to possess firearm for self-defence (1) A firearm in respect of which a licence may be issued in terms of this section is any- (a) shotgun which is not fully or semi-automatic; or (b) handgun which is not fully automatic... No person may hold more than one licence issued in terms of this section.
Volgens die wet het elke landsburger van 21 jaar en ouer wat bevoeg bevind is, die reg om ’n vuurwapen vir selfverdediging aan te skaf. Die vuurwapen en die gebruik daarvan sou proporsioneel wees tot die moontlike bedreiging. Tog bestaan die indruk dat wetsgehoorsame burgers ontmoedig word om hulself so te beskerm. Die eerste aspek wat dié indruk versterk, is die wet self – of eerder die
toepassing daarvan. Die wapenaansoeke van talle mense wat in aanmerking kom word onder die selfverdedigingskategorie afgekeur. In ’n stadium wou dit voorkom of alle aansoeke in dié kategorie afgekeur is, dikwels arbitrêr.
Die organisasie Gun Free South Africa beywer hom vir die vernietiging van alle onwettige wapens. Wanneer daar egter op sy webblad www.gfsa.org.za/ our-work na sy prestasies gekyk word, hou alles verband met die wettige eienaar en hoe die lisensiëringsproses vir die wettige eienaar moeiliker gemaak is. Dié groep het ’n groot invloed op die regering en die wetskrywingsprosesse.
VERKEERDE GROEP GEPATROLLEER?
Ek dink ’n regverdige opsomming sou wees dat die regering die anti-vuurwapenagenda ondersteun. Die verkeerde groep mense word gepatrolleer.
Ek weet van geen misdadiger wat om ’n vuurwapenlisensie aansoek doen of opleiding vir ’n bevoegtheidsertifikaat ondergaan nie. Vuurwapeneienaars is van die mees wetsgehoorsame burgers wat daar is. Die getal vuurwapens wat die polisie self verloor, is egter kommerwekkend. Van 2014 tot 2017 is 2 270 polisiewapens verloor of as gesteel aangemeld.
Die tweede aspek is dat as jy iemand doodmaak om jou lewe of dié van jou geliefdes te beskerm, jy onmiddellik van strafbare manslag of moord aangekla word. Die onus berus dan by jou (en jou prokureur) om die ware feite, omstandighede en die noodsaak van jou optrede aan te toon. Slegs daarna sal jy onskuldig bevind word.
WEES OPGELEIDE SKUT
Die vuurwapenwet van 2000, met sy bevoegdheidsvereistes, dwing ons om nie net bloot eienaars van wapens te wees nie, maar opgeleide skuts.
Alle vuurwapeneienaars moet kragtens die wet ’n basiese bevoegdheidsertifikaat hê. Heelwat nuwe opleidingsgeleenthede bestaan en baie daarvan lyk indrukwekkend. Hierdie kursusse is nie verpligtend nie, maar weens die afskaffing van kommando’s en gebrekkige polisiëring word gemeenskappe met geen ander keuse gelaat as om self vir hul opleiding te sorg nie.
Om egter meer van ’n soort wapen te besit of gespesialiseerde kennis van wapens op te bou, moet die skut lid word van SA Jagters (www.sahunters.co.za, 0861 24 868), ’n sportklub (http:// sapsa.co.za, 011 391 6463) of die SA vuurwapenversamelaarsvereniging (www.saaaca.com,
011 646 1311). Al dié organisasies monitor hul lede, wat aan die reëls van die organisasie moet voldoen vir die tydperk van sy of haar lidmaatskap.
Iemand wat bloot net ’n wapen besit, is gevaarlik en in groter gevaar as ’n ongewapende persoon. Eers ná behoorlike opleiding is jy werklik gewapen.
Neem dus deel aan sportskiet, maak gebruik van opleidingsgeleenthede en word deel van organisasies wat die regte van vuurwapeneienaars beskerm en bevorder. As die reëls van rasionaliteit en proporsionaliteit standvastig toegepas word, behoort jy jou lewe – en dié van jou naastes – met ’n wettige vuurwapen te kan beskerm.
Dr. Jan Venter doseer politieke wetenskap aan die NWU. Hy is ’n geregistreerde A-gegradeerde sekuriteitsverskaffer.