GRANAATMARK BARS UIT NATE
Die mark vir granate bars steeds uit sy nate en geniet ’n groeikurwe met ’n vraag wat die aanbod aansienlik oorskry.
Me. Nina Viljoen, ’n landbouekonoom van Hortgro, het in ’n oorsig oor die granaatbedryf gesê dié vrug is verlede jaar op altesaam 932 ha kommersieel verbou met die grootste aanplantings langs die Bergrivier en by Wellington, Malmesbury en Bonnievale.
Die kultivar wat in die gewildste is, is Hershkowitz wat in 14% van die aanplantings, hoofsaaklik in die Wes-Kaap, voorkom, gevolg deur die kultivar Acco (11%).
Die ander kultivars is minder as 3% van die boorde.
Suid-Afrika het in die vorige produksiejaar ’n afname van sowat 19% ondervind toe 1,168 miljoen kartonhouers van 3,8 kg uitgevoer is. In 2017 is meer as 1,44 miljoen kartonhouers uitgevoer.
Die gewildste uitvoerkultivar in 2018 was Wonderful, waarvan 73% of 851 291 kartonhouers uitgevoer is. Die grootste uitvoermark was Europa, die Midde-Ooste en Brittanje.
Mnr. Johan van Niekerk, besturende direkteur van Star South Fruits, sê die leeue-aandeel van die uitvoer na Europa, waar die vraag na granate toenemend styg, is danksy die toename in die getal Moslems. Granate is vir dié groep ’n belangrike voedselbestanddeel van hul vegetariese dieet. Aan die ander kant is die tradisionele Europeërs terdeë bewus van die hoë voedingsen gesondheidswaarde van granate. Die glinsterende vrugte is propvol antioksidante, vitamiene en yster.