Wol: Geen kortpad uit China-verbod
CHINA se grense sal nog minstens tot die einde van die huidige wolseisoen vir Suid-Afrikaanse wol gesluit wees ná die uitbreking van bek-en-klouseer vroeër vanjaar.
Afgevaardigdes van Suid-Afrika en China het op die onlangse kongres van die Internasionale Woltekstielorganisasie (IWTO) in Italië vergader om kwessies rakende die verbod te bespreek.
“Ná die samesprekings is dit duidelik dat daar ’n aansienlike vertraging sal wees voordat China die verbod sal ophef,” sê mnr. Deon Saayman, bestuurder van Cape Wools, in ’n verklaring.
Hy sê dat boere met hul makelaars oor bemarkingsbesluite moet praat. China koop tans nagenoeg 70% van Suid-Afrika se wol aan.
‘CHINA EERSTE’
Die Chinese het onder meer gesê dat ’n drastiese denkskuif by Chinese staatsdepartemente, waaronder die landbou en doeane-owerhede, plaasgevind het. Die uitbreking van dieresiektes in China geniet tans voorrang by Chinese owerhede. Volgens die internasionale organisasie vir dieregesondheid (OIE) se webwerf is Afrika-varkpes en hoogs aansteeklike voëlgriep twee van die dieresiektes wat tans vleisproduksie in China bedreig.
Chinese amptenare het ook gesê dat die herhaaldelike uitbrekings van bek-en-klouseer in Suid-Afrika rede tot kommer is. Verdere bilaterale handelsbesoeke tussen die lande sal ook geen gunstige resultate lewer nie.
Daarby geniet pogings om die moeilike handelsomgewing tussen China en Amerika te verbeter, ook baie aandag by Chinese owerhede.
Volgens die Chinese afgevaardigdes moet Suid-Afrika eers sy bek-en-klouseervrye status van die OIE terugkry. Dan sal die Chinese regering steeds ’n “afkoeltydperk” instel.
STEL SKEERDERY UIT
Mnr. Guillau du Toit, voorsitter van die Nasionale Wolkwekersvereniging, sê boere moet die wol so lank moontlik op die rug van die skaap hou, aangesien die prys van kort wol onder druk is.
Hoewel wolpryse ten spyte van die verbod op uitvoer na China in Februarie taamlik stabiel gebly het, is slegs 75,5% van die aanbieding op die jongste veiling verkoop.
Cape Wools sê bedryfsverteenwoordigers het op 15 April vergader om die huidige marktoestande en ’n strategie vir die bedryf te bespreek. Daar is besluit om die huidige veilingseisoen volgens die skedule te laat voortgaan om die vloei van wol na die mark toe te laat, met die opsie om bykomende verkope aan die einde van die seisoen te hou indien daar enige onverkoopte voorraad is.
Die veiling van 8 Mei skuif na 9 Mei vanweë stemdag, wat ’n openbare vakansiedag is. Die laaste veiling van die seisoen vind op 5 Junie plaas.
’n Nuwe uitvoersertifikaat is onlangs vir Egipte uitgereik, en ’n gesondheidsertifikaat vir Maleisië was teen druktyd in die proses om uitgereik te word. Saayman sê daar is ’n moontlikheid dat dié twee lande meer Suid-Afrikaanse wol sal kan verwerk, maar dit sal nog ’n ruk duur om alternatiewe markte gelykstaande aan China se volume te vind.