Satellietbeelde wys droogte se verwoesting
DIE nat en koeler toestande wat die afgelope paar weke oor dele van Suid-Afrika voorkom, was tot voordeel van die baie laat aanplantings oor veral die westelike dele van die land, maar het in ander gebiede gewasse se groei belemmer.
Mnr. Johan van den Berg, klimatoloog by Santam Landbou, sê die laer temperature en vogtige toestande oor groot dele van die land “is nie goeie nuus vir sojabone en sonneblomme wat nou ryp word nie”.
Volgens weermodelle sal erge ryp na verwagting nie voor die begin van Mei oor die binneland voorkom nie.
Volgens Graan SA se nuutste verslag oor produksietoestande word die stroop van sojabone in Mpumalanga vertraag weens die nat toestande. Die gebied ervaar ’n “baie moeilike sojaboonseisoen” en die verwagting is dat opbrengste oor die algemeen ondergemiddeld gaan wees, met goeie opbrengste hier en daar. Daar is ook ’n lae risiko dat die sojabone kan oopspring weens die weerstoestande.
Swaar neerslae oor dele van KwaZulu-Natal vertraag ook dáár die stroop van sojabone, met sekere gebiede wat reënval van 100 mm tot 180 mm binne twee weke gemeet het. Graan SA sê hael het plek-plek groot skade aan somergewasse in die provinsie aangerig. Die verwagting is dat opbrengste oor die algemeen gemiddeld sal wees, met ’n hoë risiko vir ryp op laat aangeplante mielies.
DROOGTE
“Droogtetoestande het sy tol geëis in Noordwes, en ondergemiddelde opbrengste word oor die algemeen vir somergrane verwag,” lui die verslag verder. Die goeie, wydverspreide reën van die algelope paar weke was wel van groot waarde, aangesien die grootste deel van die provinsie se grane laat aangeplant is. Die koeler weerstoestande kan egter die groei daarvan belemmer.
In die noordwestelike en sentrale dele van die Vrystaat word ondergemiddelde opbrengste vir sojabone verwag weens ’n “baie swak” seisoen, sê Graan SA. “Hoewel sonneblomme mooi vertoon, word ondergemiddelde opbrengste oor die algemeen in dié gebiede verwag. Die onlangse reën is wel voordelig vir die laat aanplantings.”
Boere in dié dele is ook bekommerd oor moontlike rypskade omdat die meeste mielies baie later as gewoonlik aangeplant is.
In die Oos-Vrystaat word ondergemiddelde tot gemiddelde opbrengste oor die algemeen vir somergewasse verwag, met vroeë mielies wat die afgelope seisoen baie stremming weens droogtetoestande ervaar het. Die gebied ervaar ook ’n swakker sojaboonproduksieseisoen. Produsente behoort binne die volgende twee tot drie weke sojabone te begin stroop, mits die weer dit toelaat.
Die reën wat oor die gebied voorkom, dra by tot gunstige vogtoestande, wat baie voordelig is vir meer koringaanplantings gedurende die winter.
LIMPOPO EN NOORD-KAAP
Die somerseisoen vir somergewasse het ’n moeilike begin in Limpopo gehad, met veral sorghumen sonneblomaanplantings op droëland wat droogtestremming ervaar het. Ondergemiddelde opbrengste word oor die algemeen vir droëland- en besproeiingsaanplantings verwag, met nat toestande wat die sojaboonstroopproses vertraag. “Sojabone begin reeds oopspring, wat verdere skade veroorsaak,” sê Graan SA.
Gemiddelde opbrengste word oor die algemeen in die somersaaigebiede van die Noord-Kaap verwag, met goeie, wydverspreide reën wat oor dié gebiede voorgekom het en mielies en sojabone wat mooi vertoon.
Die uitwerking van droogtetoestande vir die huidige seisoen oor dele van die Vrystaat en Noordwes is duidelik sigbaar op satellietbeelde van die Amerikaanse departement van landbou.
Op versoek van Silostrat het dié departement satellietbeelde van die gebied op 31 Maart 2018 vergelyk met beelde van 31 Maart 2019. –