Jy kán mielies vinnig plant
Heelwat vooruitgang is al gemaak oor presisieplant, beter spasiëring en plantspoed. ’n Veelseggende studie wys wat is die optimale plantspoed – en ook wanneer té haastig plant teenproduktief begin raak.
Met vanjaar se mielieoes in die skemer van sy bestaan, is dit byna tyd om aan die volgende oes te begin dink.
Die Universiteit van Ohio se landbouvoorligtingsafdeling publiseer jaarliks sy eFieldsverslag met proefresultate van mielie, sojaboon en ander akkerbougewasse.
Dié proewe beslaan die “standaard”kultivar, stand en bemestingsproewe, maar sluit ook toetse op die nuutste tegnologie in.
Een van die interessante studies wat vanjaar ingesluit is, is die resultate van ’n hoëspoedmielieplantstudie.
In die strewe tot toenemende produktiwiteit het die wydte van mielieplanters die afgelope 50 jaar voortdurend toegeneem totdat die praktiese maksimumwydte in 2009 bereik is met die bekendstelling van John Deere se DB120planter.
Met 48 rye gespasieer teen 76,2 cm dek dié kolossale planter 36,57 m per gang.
Daarna het vervaardigers hul klem verskuif na die verhoging van plantspoed.
In 2017 het Väderstad byvoorbeeld opspraak gemaak toe hy
502,05 ha mielies in 24 uur geplant het met sy 16 ryplanter (0,762 m) wat teen ’n gemiddelde spoed van 20 km/h tot 22 km/h getrek is. Volgens Väderstad is slegs 0,35% dubbelpitte geplant, 1,21% is oorgeslaan en die spasiëringskoëffisiënt van variasie was 24,3%, wat die variasie van die gemiddelde aandui.
BETER SPASIËRING
Verlede jaar het navorsers aan die Universiteit van Ohio die impak van plantspoed op mielieopkoms en opbrengs getoets. Daarvoor het hulle ’n 16 ry (0,762m) planter gebruik wat met Precision Planting se SpeedTube toegerus is. Met dié stelsel word die
standaardsaadbuis met ’n spesiale “saadhyser” vervang wat die sade individueel met ’n elektries aangedrewe vingerband na die grondoppervlak vervoer.
Sodoende skakel dit die probleem van standaardsaadbuise uit waar die spasiëring swakker word met ’n toename in spoed omdat die sade toenemend aan die kante van die saadbuis bons.
Gevolglik moet plantspoed tot minder as 8 km/h beperk word.
Verder verseker die SpeedTube ook dat mieliesade die plantvoor teen die grond(plant) spoed bereik, wat keer dat dit in die voor rondbons.
Binne Ohio se proef is vyf plantspoede van 8 tot 24 km/h getoets. Dit is vyf keer op die land herhaal om ’n gemiddelde effek te bepaal.
Die teikenstand was 74 000 plante per hektaar met ’n druk van 68 kg per ry en die proef het 40 ha beslaan.
Soos verwag, het hoër plantspoede swakker gevaar, maar interessant genoeg was die ongunstige uitwerking eers teen ’n spoed van 24 km/h statisties beduidend.
Dit was dus eers teen die 24 km/hkerf moontlik om statisties te bewys dat dit ’n ongunstige impak op stand en opbrengs het. Gevolglik kan ’n mens tot die gevolgtrekking kom dat ’n plantspoed van 8 km/h tot 20 km/h gehandhaaf kan word sonder dat dit die opbrengs benadeel.
Myns insiens kan plantspoed en produktiweit dus veilig verdubbel word vanaf 8 tot 16 km/h. Dít is ’n merkwaardige resultaat.
Die eFieldsverslag gee ook die resultate van studies op trekker en planterwielverdigting, sukses met stelsels wat die druk per planteenheid varieer en vele meer.
Dit is beslis die moeite werd om vanjaar se verslag hier af te laai: https://digitalag.osu.edu/ efields
Sien die SpeedTube van Precision Planting in aksie: https://bit.ly/2VyPIZd
Vir nog inligting oor die
John Deere-planter: https://bit. ly/2UqzBjX
Dr. Jan C. Greyling is ’n boer, navorser, landbou-ekonoom en dosent aan die Universiteit Stellenbosch. Hy het pas sy doktorsgraad aan die US behaal. Sy tesis het gehandel oor die produksie en produktiwiteit van mielieverbouing in Suid-Afrika en die invloed wat veranderende landboubeleid in die twintigste eeu daarop gehad het, met spesifieke verwysing na die ruimtelike implikasies.