NUWE ERA-WENNER SE GROOT PRYS ELEKTRONIESE AKTES
Mnr. Andries van der Poll, wat saam met sy vrou, Jackie, en hul seun, Jacqueon, by Riebeek-Wes in die Wes-Kaap boer, is as Graan SA se Kommersiële Boer vir die Nuwe Era aangewys. Hier is Andries en Jackie op die John Deere-trekker wat hy as prys ontvang het. Hulle het ’n wisselboustelsel van koring en medics op droëland, en boer ook met mielies onder besproeiing, Dohne-Merino’s en rooi Angusbeeste. Me. Anna Ratshikana (89), wat tussen Lichtenburg en Mahikeng in Noordwes boer, het ’n sertifikaat van erkenning ontvang. Mnr. Sabatha Mthethwa van Newcastle in KwaZulu-Natal is as Potensiële Kommersiële Boer van die Jaar aangewys. Pres. Cyril Ramaphosa het vroeg in Oktober die Wet op die Elektroniese Akteregistrasiestelsel gepromulgeer. Dit maak voorsiening vir die ontwikkeling van ’n elektroniese akteregistrasiestelsel wat dit vir aktebesorgers en die registrateur van aktes moontlik sal maak om titelaktes en verwante dokumente elektronies te verwerk, voor te berei en in te dien. Die presidensie sê in ’n verklaring die nuwe stelsel sal ook die doeltreffende registrasie van groot volumes titelaktes moontlik maak, akteregistrasies bespoedig, openbare toegang tot aktekantore en inligting verbeter, en die proses veiliger maak. “Dit sal sekerheid van titel en die verkryging en verkoop van vaste bates beduidend versterk,” luidens die verklaring.