DIE ANDER SÊ
LUIDENS ’n nuwe reeks studies wat op 30 September in die Annals of Internal Medicine gepubliseer is, het ’n internasionale groep navorsers bevind daar kan nie wetenskaplik bewys word dat ’n verband bestaan tussen ’n dieet wat baie rooivleis en verwerkte vleis bevat, en die risiko van hartsiektes, kanker en ander siektes nie.
Enige gesondheidsvoordele verbonde daaraan om minder bees- en varkvleis te eet, is klein, en net merkbaar as jy na groot bevolkingsgroepe kyk. Dit is nie beduidend genoeg om mense aan te sê om hul vleiseetgewoontes te verander nie.
Dié nuwe ontledings is onder die grootstes wat al aangepak is. Dit kan toekomstige dieetkundige aanbevelings beïnvloed, en stel ongemaklike vrae oor dieetkundige raad en navorsing, en watter standaarde vir sulke studies gestel moet word.
Die groep het 61 navorsingsartikels wat oor 55 bevolkingsgroepe met meer as 4 miljoen deelnemers handel, hersien. Hulle het ook ewekansige proewe ondersoek wat rooivleis verbind met kanker en hartsiektes (daar is baie min), asook 73 artikels wat verbande tussen rooivleis, kanker en sterftes ondersoek.
In elke studie het wetenskaplikes bevind die verband tussen die eet van rooivleis en siekte en dood was klein, en die gehalte van die getuienis was laag tot baie laag.
Binne die eerste week ná die studie gepubliseer is, het die Amerikaanse hartvereniging, Amerikaanse kankervereniging, die Harvard T.H. Chan School of Public Health en ander groepe die bevindinge skerp gekritiseer, asook die joernaal wat dit gepubliseer het.