Vermy verwarring oor korrelkalk

Onderskeid moet getref word tussen verskillende soorte korrelkalk en die onderskeie toepassings daarvan. Idwala gee raad.

Korrelkalk, of kunsmisvuller, is ’n verwarrende begrip wat in die kunsmisbedryf gebruik word wanneer growwe, kristalagtige kalk as ’n vuller by kunsmis ingemeng word. Dit dra weinig by tot die neutralisasie van grondsuurheid.

Gewone, verkorrelde landboukalk is wat partikelgrootte betref enigiets van 106 µm tot 1 700 µm (1,7 mm). Die verkorrelingsproses maak dit slegs makliker om toe te dien en stofverliese te beperk. Dit is egter baie duurder as gewone kalk vanweë die bykomende prosesse en die verkorrelingsprodukte. Indien hierdie gewone kalkkorrels in die grond ingewerk word, skep dit ’n beperkte sone waarin wortels kan ontwikkel, en die verspreiding van die kalk word beperk. Dit lewer ’n geringe bydrae tot die neutralisasie van grondsuurheid indien dit só toegedien word.

Proewe deur die NoordwesUniversiteit het bevestig dat gewone, verkorrelde kalk nie die tradisionele toediening van kalk vervang nie (Dreyer, 2017).

PRODUKTE

Verkorrelde, mikrofyn kalsium en magnesiumkarbonaat is soms met kalsiumsulfaat (gips) verryk.

Verskeie produkte met verskillende partikelgroottes is beskikbaar. Slegs enkele maatskappye kan die partikelgroottes waarborg omdat hul fabrieke aan ISO-standaarde voldoen.

Kulucal en Kuludol van Idwala is voorbeelde van geregistreerde produkte met gewaarborgde partikelgroottes. Die gemiddelde gewaarborgde partikelgrootte is 40 µm. Tydens verkorreling word organiese sure gebruik wat die reaksie van die karbonaat in die grond beïnvloed. Dit lei dan nie tot ’n skielike verhoging in die pH nie en is eintlik nie meer ’n kalk nie, maar ’n plantvoedingstof.

Die doel van dié produkte is om kalsium, magnesium en swael aan te vul. Die produkte kan ’n bydrae tot die neutralisasie van grondsuurheid lewer, maar dit is nie daarvoor bedoel nie.

OMYA, die internasionale Switserse maatskappy waarmee Idwala ’n jare lange verhouding het, bemark soortgelyke produkte wêreldwyd. Kombinasies van die produkte is op die mark beskikbaar. Kuludol 20 is byvoorbeeld ’n mengsel van 80% dolomiet en 20% gips. Kulucal 30 is 30% gips en 70% kalsiet.

Kulucal en Kuludol word voor of ná planttyd breedwerpig op die oppervlak gestrooi. Dit breek op en dissosieer om oor die grond te versprei.

Sojabone is baie gevoelig vir grondsuurheid, veral omdat die trivalente vorm van aluminium dan vir plantopname beskikbaar is. Al3 is giftig vir plantwortels en 2 dele per miljoen is genoeg om wortelgroei drasties te beperk.

Onderskei só tussen die verskillende produkte:

■ Doen navraag oor die registrasienommers en maak seker die verkoper is ’n agent van die

maatskappy se produk.

■ Doen navraag oor die ISO-standaarde van die vervaardiger.

■ Doen navraag oor die produk se gewaarborgde partikelgrootte.

■ Onthou dat 40 µm en minder baie moeilik uitgesif kan word. ’n Nat sifproses is nodig om die gehalte te bepaal. Siwwe van 40 µm is beskikbaar om die nattoets te doen.

■ Toets die produkte in ’n glas water om te bepaal hoe vinnig dit dissosieer.

■ Neem ’n monster van die produk volgens die departement van landbou, landelike ontwikkeling en grondhervorming se voorgeskrewe proses en stuur dit na ’n laboratorium vir ontleding (chemies sowel as fisies).