DIÉ HUPSTOOT KAN HELE BEDRYF BAAT
DIE Suid-Afrikaanse onderneming Ruvalabs, onder meer bekend om sy geharde weefselkultuur-bloubessieplantjies en -onderstamme vir vrugtebome, beoog uitbreidings danksy nuwe buitelandse en plaaslike aandeelhouers.
Die plaaslike boerdery ZZ2, die Italiaanse onderneming Vitroplant Italia srl Società Agricola, en Hishtil SA, ’n internasionale groente- en ornamentele kwekerygroep met sy wortels in Israel, is van die groot ondernemings wat nuwe aandeelhouers geword het.
Ruvalabs staan voortaan as Vitroplant SA bekend, sê mnr. Rijk Danckwerts, besturende direkteur wat self ’n groot belang in die onderneming behou, luidens ’n verklaring.
Danckwerts sê die vraag na siektevrye jong weefselkultuurplantjies in Suider-Afrika bly groei. Die nuwe belegging sal die onderneming in staat stel om in dié vraag te voorsien.
Vitroplant SA het die vermoë en infrastruktuur om weefselkultuur-plantmateriaal in groot kommersiële hoeveelhede te kweek. Hy wil ’n reeks neutbome, druiwe, aartappels, granate, ornamentele en medisinale plante produseer.
OPWINDEND
Mnr. Tommie Van Zyl van ZZ2 sê Vitroplant SA gaan ’n groot en opwindende uitwerking op die plaaslike bedryf hê.
“Ons is betrokke omdat uitnemendheid met plantmateriaal so belangrik is, dit moet siektevry en tydig wees,” sê Van Zyl.
ZZ2 het in vennootskap met Hishtil ervaring in sy eie tamatiekwekery opgedoen en geënte plantjies, veral vrugagtige groente, soos soetrissies en tamaties, asook waatlemoene en spanspekke die land ingebring.
“Deur dié ervaring het ons bewus geraak van die tekortkominge in ons huidige voorsieningslyne.
“Weefselkultuur is ’n baie sterk bemagtiger. Dit is ’n hefboomskepper waarmee ’n klomp probleme opgelos kan word.
“Dit maak die pad van sertifisering van plantmateriaal in Suid-Afrika baie korter. Met die inbring van plantmateriaal op die tradisionele manier verloor ’n mens twee jaar, want dit moet in kwarantyn bly.
“As jy weefselkultuur-materiaal inbring, bespaar jy tyd, want dit is in vitro-materiaal wat per definisie ‘skoon’ materiaal is.
“As jou stroomaf prosesse ook skoon is, wen jy nie net tyd nie, maar ook die stryd teen plantsiektes.”
VOORSTE PRODUSENT
Van Zyl sê dit is ’n groot voorreg om in ’n gesamentlike onderneming met Vitroplant Italia te wees, wat reeds jare lank in Europa, die Midde Ooste en die Amerikas geag word as ’n voorste produsent van weefselkultuurplante en boompies wat gereed is om te plant.
“Dit beteken ’n mens het onmiddellik Europese tegnologie as deel van jou stelsels. Ons word onmiddellik blootgestel wanneer nuwe tegnieke daar ontwikkel word.
“Die waarde vir hulle is dat hulle ’n vennoot in Afrika het, wat ook nie net sit en wag vir beter dae nie.”
Van Zyl sê Vitroplant SA se nuwe aandeelhouers help die onderneming, deur hul belegging en netwerke, om skaal te verkry en sy grondslag te verbreed. Die doel is nie om eksklusief vir ZZ2 te bevoordeel nie, maar die hele bedryf.
“As ’n mens ’n ekostelsel kan skep waar verskillende aspekte van die hele waardekanaal op ’n simbiotiese manier kan begin saamwerk, kry jy versnellereffekte.
“Ons wil Suid-Afrika in die kalklig plaas en die hele bedryf internasionaal mededingend hou. Nuwe kultivars moet so gou moontlik geplant en geproduseer word. As dit te lank duur, is ons die hele tyd op die agtervoet met ons mededingers,” sê Van Zyl.
GEMAGTIG
Ruvalabs (en dus nou Vitroplant SA) is reeds ’n paar jaar ’n gemagtigde kwarantynsentrum vir ingevoerde plante.
Vitroplant Italia is gemagtig om groot hoeveelhede Malusen Prunus-invitro-weefselkultuurmateriaal na Vitroplant SA uit te voer.
Die onafhanklike sertifiseringsraad vir saadaartappels het Vitroplant SA voorts ook goedgekeur vir die onderhoud en kweking van in vitroplantjies.