NISGEWASSE KAN NIE SERTIFISERING ONTDUIK
‘Hulle het ingestem om vanjaar as ’n oorgangsmaatreël kanola van boere met foutiewe paspoorte te ontvang.’
GRAAN- en oliesaadboere is op ’n steil kurwe van leer en aanpas by reëls oor die nakom van vereistes vir voedselveiligheid.
In die geval van kanola moet boere, die chemiese bedryf en die verwerker saamwerk om die bedryf te beskerm deur die aanmelding van chemiese middels wat gebruik word, registrasie van middels en goeie en tydige kommunikasie.
Sertifisering om voedselveiligheid te verseker, is al jare lank ’n roetinetaak vir vrugte- en groenteboere, maar ’n nuwe verpligting vir graan- en oliesaadboere.
Soill (Southern Oil Limited Bpk.), Suid-Afrika se grootste koper en verwerker van kanola, het jare gelede met ’n “kanolapaspoort” begin om inligting te kry oor die plaagbestrydingsmiddele wat boere op die gewas gebruik en by lewering vir residue daarvan te toets.
Moutgars- en broodkoringprodusente sal hulle binnekort aan iets soortgelyks
moet onderwerp.
NISGEWAS
Die probleem met kanola is dat dit ’n nisgewas is wat kwalik die tyd, werk en koste verbonde aan registrasie van plaagbestrydingsmiddels daarop regverdig, sê mnr. Koos Blanckenberg, voorsitter van die kanolabedryfskomitee van Graan SA.
Blanckenberg sê die werklikheid is as ’n boer weet van ’n doeltreffende middel wat teen ’n sekere plaag by ander gewasse geregistreer is, sal hy dit gebruik
as hy sy kanola-oes teen die plaag moet beskerm. “Hy kan nie wag tot die middel eendag vir kanola geregistreer is nie.”
Verder sal boere onder druk van stygende koste en laer opbrengste vanweë die droogte, dikwels generiese produkte wat nie geregistreer is nie, maar dieselfde aktiewe bestanddeel as die geregistreerde produk bevat en baie goedkoper is, gebruik.
Wat ’n boer in só ’n geval moet doen om te help om die integriteit van die waardeketting te beskerm, is om alles wat hy gespuit het – of dit geregistreer is of nie – op die paspoort in te vul.
LEEMTES
“Soill ondervind van tyd tot tyd probleme met residue en moet optree teen die leemtes in sy voedselveiligheidstelsel. Die onderneming het ingestem om vanjaar as ’n oorgangsmaatreël kanola van boere met foutiewe paspoorte te ontvang, maar dit afsonderlik te hanteer.”
Blanckenberg sê die beste wat boere kan doen om hul bedryf te beskerm, is om die kanolapaspoorte eerlik en volledig in te vul. Die kanolabedryfskomitee sal ook weer probeer om middels geregistreer te kry vir plaagbestrydingsleemtes in die bedryf.