Listeriose: Verpligte standaarde tree in werking
DIE nuwe regulasies vir die beskerming van verwerkte vleis wat saamgestel is ná die uitbreking van listeriose in Suid-Afrika in 2017 en verlede jaar is van vandeesmaand verpligtend.
Altesame 209 mense het weens die uitbreking gesterf en meer as duisend voorvalle is van 1 Januarie 2017 tot 5 Junie verlede jaar aangemeld. Dié statistieke het die regering laat besef dat Suid-Afrika geen verpligte voedselveiligheidstandaarde vir verwerkte vleis het nie. Verbeterde voedselveiligheid is met behulp van bestaande wetgewing, die Suid-Afrikaanse Nasionale Standaarde (SANS) 885, verseker, terwyl die verpligte regulasies saamgestel is.
Die nuwe regulasies wat in werking tree, maak inspeksies van verwerkingsaanlegte moontlik om ’n soortgelyke uitbreking te voorkom.
Die verpligte spesifikasies vir verwerkte vleisprodukte (VC 9100) is opgestel deur die departement van handel en nywerheid met die samewerking van die departement van gesondheid. Hierdie regulasies sal deur die nasionale reguleerder vir verpligte spesifikasies (NRVS) afgedwing word.
TOEPASSING
Die departement van handel en
nywerheid het aangedui hy gaan saam met die departement van landbou, grondhervorming en landelike ontwikkeling werk om die nuwe regulasies ten opsigte van die Wet op Landbouprodukstandaarde af te dwing.
Die NRVS sal ’n uitgebreide reguleringsprogram vir inspeksies reg oor die land opstel wat dit vir die regering en die bedryf moontlik sal maak om enige voedseloorgedraagde bakterieë vroeg op te spoor.
Mnr. Ebrahim Patel, minister van handel, nywerheid en ekonomiese ontwikkeling, sê die regulasies is ’n belangrike stap om te verseker dat die verbruiker teen skadelike voedseloorgedraagde bakterieë beskerm word.
“Ons kosbedryf is belangrik vir die land se ekonomiese ontwikkeling en werkskepping.”
REGULASIES
Die verpligte spesifikasies is van toepassing op die hantering, voorbereiding, verwerking, verpakking, verkoeling, vries, etikettering en opberging van hitte-behandelde en eetgereed-vleisprodukte soos bepaal in SANS 885.
Dit is egter nie van toepassing op blikkiesvleis, rou boerewors, wildswors, gemengde wildswors, hoendervleis en rooivleis (skaap, bok, vark en bees) wat onverwerk is nie. Produkte wat op so ’n manier verwerk is dat die produk steeds lyk soos die oorspronklike, rou karkas, snit of stukke (gevries of ongevries), val ook nie onder die nuwe regulasies nie, want dit word deur ander toepaslike nasionale wetgewing gereguleer. Die regulasies kan by bit.ly/2ou390X besigtig word.