WYNBOERE: WEES PARAAT VIR WITROES
DIE gevaarligte flikker tans in die Wes-Kaap met toestande wat gunstig is vir die ontwikkeling van witroes.
Mnr. Pieter le Roux van Villa Crop Protection het op Vinpro se inligtingsdag vir die Worcester- en Breedekloofstreek wingerdboere gemaan om tydig op te tree om witroes te bekamp. Dit sal boonop goedkoper wees as om eers te begin spuit wanneer simptome kop uitsteek.
“Ek is baie bekommerd oor die witroessituasie in die Wes-Kaap op die oomblik. Akkerbome en selfs onkruide is oortrek met witroes. Dis nie dieselfde witroes wat wingerd aanval nie, maar dit het dieselfde toestande nodig om te ontwikkel. Boere moet dus na hul bespuitings kyk.”
Slegs 3%-witroesbesmetting kan lei tot onaangename geure en kleurverliese in wyn.
Hy het toestande beskryf wat ideaal is vir witroesbesmettings. Dit sluit in ’n lewendige groeityd (hoog in stikstof) en geil groeitoestande, temperature van 20 ºC tot 27 ºC, relatiewe humiditeit van 65% tot 85%, lae UV-bestraling (soos bewolkte weer of oorskaduïng deur ’n digte blaredak) en nat tye gevolg deur lang tye met ’n hoë relatiewe humiditeit. Volgens Le Roux is kultivars soos Chardonnay, Chenin blanc, Riesling, Semillon, Pinotage, Sultana en Muskadel vatbaar vir witroes.
Hy het boere aangeraai om plekke op hul plase te identifiseer waar die omstandighede vir witroes goed is, en dit gedurig dop te hou vir die eerste aanduidings van die siekte sodat hulle betyds kan optree.
EERSTE TEKENS
“Die eerste tekens van witroes is nie met die oog sigbaar nie. Kyk op jong blare met hoë stikstofvlakke, want dís waar witroes eerste kop uitsteek. Hoekige, geel vlekkies op die blare is die eerste teken wat jy kan sien.”
Om witroes ten volle te bestry, verg sowat agt spuittoedienings. Die totale koste beloop ongeveer R950/ha. “Moenie bespaar op jou eerste bespuiting nie. Spuit eerder betyds, en as jy jou werk goed gedoen het, sal jy op die laaste bespuiting voor Kersfees kan spaar.”
‘Hoekige, geel vlekkies op die blare is die eerste teken wat jy kan sien.’