GRAAN SA GAAN OPBRENGS NASIONAAL TOETS
’N NASIONALE opbrengskompetisie vir graan word van 2020 onder die vaandel van Graan SA aangebied om alle graankultivars, wat tegnies oor dieselfde kam geskeer word, binne eiesoortige en individuele produksiepraktyke te vergelyk.
Die beplanningsfase van die kompetisie behels die opstel van ’n standaardprotokol om te verseker dat alle deelnemende saadmaatskappye en graanprodusente ingevolge dieselfde kriteria beoordeel word.
Volgens Graan SA is Pioneer, ondersteun deur Corteva, die hoofborg vir dié kompetisie.
Die formaat daarvan is só saamgestel dat individuele saadmaatskappye se streekkompetisies met ’n oorhoofse nasionale kompetisie sal koördineer.
Elke saadmaatskappy sal steeds sy eie opbrengskompetisie aanbied, waarvan die wenners tot die Graan SAkompetisie kan deurdring.
“Opbrengs en doeltreffendheid is ’n belangrike deel van produksiewinsgewendheid en dit is dus vir produsente belangrik om te leer wat gedoen kan word, en in watter toestande,” sê dr. Dirk Strydom, bestuurder van graanekonomie en bemarking by Graan SA.
“Die kompetisie bied ’n platform aan graanprodusente om nuwe tegnologie, produksiepraktyke en idees te beproef om die hoogste opbrengs te verseker.”
KATEGORIEË
Produsente kan in verskeie kategorieë vir onder meer droeland en besproeiingsgrond meeding. Deelnemers sal ook in streke en op nasionale vlak geklassifiseer word en vernuwende produksiepraktyke en slim boereplanne sal aangemoedig word om die hoogste opbrengs per hektaar te behaal.
Mnr. Jannie de Villiers, uitvoerende hoof van Graan SA, sê sy organisasie is daartoe verbind om die volhoubaarheid van graanprodusente te bevorder.
“In ’n omgewing met wisselvallige produksietoestande en markte kan vernuwende praktyke om ’n hoë opbrengs te bewerkstellig, vir produsente van onskatbare waarde wees,” sê De Villiers.