HORTGRO BELOON SY UITBLINKERS
LANDBOUWEEKBLAD was onder die pryswenners by die Suid-Afrikaanse sagtevrugtebedryf se 44ste jaarlikse toekennings vir uitmuntende prestasies in die landbou.
Vier mense het toekennings ontvang vir werkprestasie op sagtevrugteplase en drie vir hul regstreekse en onregstreekse bydraes tot die bedryf.
Mnr. Mzumkhulu Colin Sijinga van Kromfontein in die Koue Bokkeveld is aangewys as Algemene Landbouwerker van die Jaar vir sy besonderse werksetiek. Buiten die fenomenale 8 300 sakke vrugte wat hy in paktyd pluk, is hy ook die trekkerbestuurder vir sy span. Hy is aangewys as die beste trekkerbestuurder op Kromfontein. Hy het ook uitstekende snoeivaardighede.
Mnr. Kerneels Oncker van Graaff Fruit by Rietfontein in die Koue Bokkeveld is aangewys as Spesialis-landbouwerker van die Jaar vir sy besproeiingskennis en -vaardighede. Toe hy in 2003 op Rietfontein begin werk het, het hy groot belangstelling in besproeiing getoon.
Hy is toe by die besproeiingspan gevoeg. Hy het sedertdien verskeie kursusse gevolg om sy kennis te verbreed en vaardighede te ontwikkel, naamlik NQF1, besproeiingsen reguleringskursusse vir pompe, asook ’n vurkhyserlisensie. As besproeiingspesialis is Oncker verantwoordelik vir 218 ha.
Me. Elize Boer van Elim Farm naby De Doorns is aangewys as Gevorderde Landbouwerker van die Jaar vir haar uitstekende bestuursvaardighede, beplanningsvermoë en die versorging van haar medemens. Boer is die pakhuis- en plaasbestuurder van Verdorsniet Plaas, wat verdeel is in drie plase, naamlik Môreson, Lentelus en Elim. Sy het drie produksiebestuurders wat onder haar leierskap val, en sorg voortdurend dat almal hul werk na die beste van hul vermoë verrig.
Mnr. Raymond Koopstad van die Breederiviervallei het die Nuwe Generasie-prys ontvang vir sy besluitneming as ’n nuweling in die sagtevrugtebedryf vir die sukses wat hy behaal het in ’n grondhervormingsvennootskap. Me. Sheila Storey van Nemlab, ’n wêreldklas-spesialis op die gebiede van grondlewe, plantprestasie en aalwurmbekamping, het die Innovasie-prys ontvang vir haar jare lange tegniese en wetenskaplike bydraes tot die sagtevrugtebedryf.
Mnr. Pieter Graaff, eienaar van Witzenberg Properties, het die Bedryfsleier-eerbewys ontvang vir sy leierskap in die landbousektor oor die afgelope 35 jaar. Graaff is die grootste individuele appelprodusent in Suid-Afrika en is Landbouskrywers SA se nasionale Boer van die Jaar 2018.
Landbouweekblad het die Izethelo-mediaprys vir landboujoernalistiek ontvang vir 100 jaar se uitsonderlike verslaggewing en kameraderie onder die Suid-Afrikaanse boeregemeenskap. Chris Burgess, redakteur van Landbouweekblad, het die toekenning namens die tydskrif ontvang.