AVOKADOVERGIFTIGING BY DIERE
Onskoeiehetblarevanafgekapteavokadobome gevreet. Nou het hul melk opgedroog. Kan jy ons meer inligting oor dié vergiftiging gee?
Die inname van avokado (Persea americana) word verbind met hartspierbeskadiging by soogdiere en voëls, asook met ’n steriele mastitis by lakterende soogdiere. Beeste, skape, bokke, perde, muise, konyne, marmotte, rotte, budgies, kanaries, kokketiele, volstruise, kuikens, kalkoene en visse is vatbaar. Kouvoëls is die vatbaarste, terwyl kuikens en kalkoene weerstandiger teen vergiftiging is. Honde is ook baie weerstandig, hoewel daar ’n paar gevalle van vergiftiging aangeteken is.
Die inname van vrugte, stamme en sade is giftig, terwyl die blare baie giftig is. Die Guatamaalse (Hass en Fuerte), Wes-Indiese en Mexikaanse avokadokultivars word gewoonlik met vergiftiging verbind.
Die gifstof in avokado is persin. Avokado maak die selletjies in die uier dood (nekrose) en veroorsaak ook bloeding in die uierweefsel van lakterende diere. Nekrose van die hartspier by voëls en soogdiere vind plaas. Steriele mastitis vind 24 uur ná die inname van avokado’s by lakterende diere plaas met ’n daling van 75% in melkproduksie. Die uiers is ferm en geswolle en waterige melk kom voor. Melkproduksie kan wel in ’n mate plaasvind, en hartskade kan plaasvind as laer dosisse van avokado ingeneem word.
By nie-lakterende diere of by hoër dosisse kan hartprobleme binne 24 uur tot 48 uur ná inname ontwikkel. Kliniese tekens sluit in tamheid, asemhalingsprobleme, onderhuidse swelling, sianose (suurstoftekort), hoes, beperkte beweging en vrektes. Perde se kop, tong en bors swel.
Voëls is tam, haal moeilik asem en wil nie vreet nie. Onderhuidse swelling van die nek en borsdele kom voor en hulle kan vrek.
’n Diagnose word gemaak op grond van die geskiedenis en kliniese tekens. Ander toestande of oorsake is masitis, ionofoorvergiftiging, seleentekorte, gossipol, hartglikosiedvergiftiging en ander harttoestande.
BEHANDELING
Kontak jou veearts. As die hart nog nie aangetas is nie, kan geaktiveerde koolstof aan diere gegee word (2 g per kilogram liggaamsgewig). Dalk help dit. As die hart reeds aangetas is, sal dit egter te laat wees.
Dr. Faffa Malan is bestuurder van die Herkouerveterinêre Vereniging van Suid-Afrika.