Drie toptelers mik na stoetteler-kroon
Drie finaliste is aangewys om sake uit te spook om die titel as Pick n Pay, Landbouweekblad en Breedplan se Stoetteler van die Jaar.
Twee stoettelers van die Vrystaat en een van Noordwes ding vanjaar teen mekaar mee om as Stoetteler van die Jaar aangewys te word. Die finaliste is mnre. André van der Merwe (Wouman-Brangus, Reitz), Derick le Roux en gesin (Xourel-Limousin, Coligny) en Riaan Theron (RAT-Brahmane, Koppies).
Die wenner word op die jaarlikse Aldam-veeskool aangewys. Die veeskool word deur die Lewendehawe-registrerende Federasie (LRF) en Landbouweekblad aangebied.
WOUMAN-BRANGUS
Mnr. André van der Merwe boer by Reitz in die Oos-Vrystaat en het binne 14 jaar merkwaardig baie reggekry. Nie net kry die kudde volpunte vir volledigheid van prestasierekordhouding nie, maar dit is ook in 2014, 2015, 2016, 2017 en verlede jaar deur die Brangus-beestelersgenootskap as die top-Branguskudde in Suid-Afrika aangewys.
Die kudde se gemiddelde tussenkalfperiode is 370 dae met ’n gemiddelde speenpersentasie van 97,3. Jong bulle word aan veldbultoetse onderwerp voor hulle gebruik of verkoop word.
Van der Merwe het verlede jaar 27 bulle aan stoet- en kommersiële telers oral in Suid-Afrika verkoop. Hy dien in die Brangus-telersgenootskap se raad en is vir genomika verantwoordelik.
XOUREL-LIMOUSIN
Le Roux en sy gesin boer naby Coligny in Noordwes met die naasgrootste Limousin-stoetkudde in die land. Hulle het nuwe tegnologie volledig aangegryp. Verse word op 12 maande oud gespoel en in vitro bevrug met semen van jong bulle (12-14 maande oud). Gevolglik is die generasie-interval in die kudde minimaal.
Genetiese koppeling en diversiteit word verhoog deur bulle uit Kanada, Amerika, Australië en Europa te gebruik. Vrugbaarheid is die belangrikste seleksiekriterium. Dit word weerspieël in die gemiddelde tussenkalfperiode van 385 dae.
Die kudde kry volpunte vir volledigheid van prestasie-aantekening, en 29 bulle is verlede jaar aan stoet- en kommersiële telers oral in Suid-Afrika verkoop.
Le Roux is die visevoorsitter van die Limousin-beestelersgenootskap en voorsitter van die rasverbeteringskomitee.
RAT-BRAHMANE
Mnr. Riaan Theron is die afgelope 13 jaar by die stoettelersbedryf betrokke en boer in die distrik Koppies, Vrystaat. Die kudde het die hoogste punt vir volledigheid van prestasie-aantekening onder Suid-Afrikaanse Brahmantelers.
Verse word op die ouderdom van 16-20 maande gedek. Die kudde spog met ’n speenpersentasie van 86.
Die klem van Theron se seleksie is op ’n aangepaste, geharde, vrugbare en funksionele vroulike dier met uitstekende moedereienskappe en wat elke jaar ’n goeie kalf grootmaak.
Bulle moet goeie bespiering en manlike eienkappe vertoon. RAT-Brahmane het verlede jaar 26 bulle aan stoet- en kommersiële telers in Suider-Afrika verkoop. Theron dien in die raad van die Brahman-beestelersgenootskap en is verantwoordelik vir die portefeulje wat oor finansiële, kantoor- en administratiewe sake toesig hou.
Prof. Frikkie Neser is hoof van die departement vee, wild en weidingkunde aan die fakulteit natuur- en landbouwetenskappe, Universiteit van die Vrystaat.